“Dini etiqad azadlığı haqqında” qanuna dəyişikliklər edilir, yəni, mövcud qanunun müddəları yumşaldılır.
Gununsesi.info xəbər verir ki, Milli Məclisin (MM) İctimai birliklər və dini qurumlar komitəsinin bu gün keçirilən iclasında “Dini etiqad azadlığı haqqında” qanuna dəyişikliklər məsələsi müzakirə olunub.
Qanuna nəzərdə tutulan dəyişiklik barəsində məlumat verən MM-in İctimai birliklər və dini qurumlar komitəsinin sədri Siyavuş Novruzov bildirib ki, adıçəkilən sənədin 1-ci maddəsində mövcud olan qaydaya əsasən əcnəbilər və vətəndaşlığı olmayan şəxslər tərəfuindən dini təbliğatın aparılması qadağan olunurdusa, yeni təklif olunan variantda dini mərkəzlər tərəfindən dəvət edilmiş din xadimləri istisna olmaqla, əcnəbilər və vətəndaşlığı olmayan şəxslərə dini təbliğatın aparılması qadağan edilir.
Digər dəyişiklik isə qanunun 21-ci maddəsinə nəzərdə tutulur.
Belə ki, mövcud varianta görə, xaricdə təhsil almış Azərbaycan vətəndaşlarına İslam dininə aid ayin və mərasimlərin aparılması qadağan olunur.
Ancaq təklif olunan dəyişikliyə əsasən xaricdə dini təhsil almış Azərbaycan vətəndaşlarına Qafqaz Müsəlmanları İdarəsi tərəfindən müvafiq icra hakimiyyəti orqanı ilə razılaşdırılmaqla, İslam dininə aid ayin və mərasimlər aparmağa icazə verilə bilər.
Həmçinin, qanunun 24-cü maddəsinə nəzərdə tutulan dəyişikliyə əsasən isə “Vətəndaşların təhsil alması üçün xarici ölkələrin dini tədris müəssisələrinə göndərilməsi, dini tədris müəssisələri tələblərinin və müəllimlərin, habelə din xadimlərinin və mütəxəssislərin mübadiləsi müvafiq icra hakimiyyəti orqanı ilə razılaşdırmaqla, dini mərkəz tərəfindən həyata keçirilir”.
Müzakirələr davam edir.
Mürtəza
Gununsesi.info
