Əfqanıstan Nəqliyyat və Aviasiya Nazirliyi ötən şənbə ölkənin şimalında qəzaya uğrayan təyyarədə itkin düşən 6 nəfərdən 2 nəfərin cəsədlərinin tapıldığını açıqlayıb.
Gununsesi.info xəbər verir ki, Əfqanıstanın şimalındakı Bədəxşan əyalətində qəzaya uğrayan “Falcon 10” tipli təyyarənin göyərtəsində olan 6 nəfərin hamısı tapılıb. Dünən təyyarədə olan 4 nəfərin sağ-salamat qəzadan xilas edildiyini açıqlayan Əfqanıstan Nəqliyyat və Aviasiya Nazirliyi, davam edən axtarış-xilasetmə işləri zamanı itkin düşən 2 nəfərin cəsədinin tapıldığını bildirib.
Rusiya mətbuatında yer alan xəbərlərdə Taylandın Pattaya şəhərindəki Utapao hava limanından havaya qalxan təyyarənin Hindistan və Özbəkistan üzərindən Rusiyanın paytaxtı Moskvaya xəstə daşıdığı bildirilib.
Xəbərdə təyyarənin ötən şənbə günü axşam saatlarında Əfqanıstan üzərində radarlardan itdiyi, ilkin təsbitlərə görə 4-ü ekipaj olmaqla 6 nəfərin olduğu bildirilib.
Gununsesi.info
