“Azərbaycan dövləti hər zaman zabitə kifayət qədər xərc çəkir, oxudur, yetişdirir və müəyyən mərhələyə çatdırır. Təbii ki, zabit bu dövr ərzində çalışmalıdır ki, özündən sonrakıları formalaşdırsın”.
Gununsesi.info xəbər verir ki, bunu Milli Məclisin Regional məsələlər komitəsinin sədri Siyavuş Novruzov dekabrın 5-də keçirilən parlamentin plenar iclasında çıxışı zamanı deyib.
“Zabitlərimiz tək döyüşçü yox, həm də döyüşə rəhbərlik edəndir. Digər tərəfdən Azərbaycan kifayət qədər yeni texnika alır. Bunun işlənməsi və başqa nəsillərə ötürülməsinə zaman lazımdır. Təqaüdə getməyin də ən çox səbəbi budur ki, qorxur, gələcəkdə hansısa səhvə yol verdiyinə görə ordudan uzaqlaşdırılsın və təqaüdü ala bilməsin. Lakin bu sahədə işləyən bütün insanların hamısı təqaüd alır. Mənə II Qarabağ müharibəsi və Aprel döyüşlərində iştirak edən və 43 yaşında təqaüdə çıxan şəxs müraciət edib ki, ikinci iş axtarır. Deyir ki, böyük marketlərdə balıq təmizləyim. Böyük rütbəli adam necə gedib balıq təmizləsin?! Əsgərləri gəlib görəcək ki, komandiri balıq təmizləyir. Qanuna təklif edilən dəyişikliklərin mahiyyəti ondan ibarətdir ki, öz işi ilə bağlı zabit funksiyasını necə yerinə yetirir.
Dislokasiya ilə bağlı məsələyə gəlincə, Azərbaycanın eni uzunu 3 top gülləsi boydadır. Üç top dalbadal atılsa o biri başa çatacaq. Ona görə də Azərbaycanda müxtəlif qüvvələr müxtəlif dislokasiyaya yerləşdirilir”, – o qeyd edib.
Gununsesi.info
