İsrail-Fələstin münaqişəsinin həlli yolu 1967-ci il sərhədləri daxilində və paytaxtı Şərqi Qüds olan müstəqil, suveren və coğrafi cəhətdən inteqrasiya olunmuş Fələstin dövlətinin yaradılmasından keçir.
Gununsesi.info xəbər verir ki, bunu Türkiyə prezidenti Rəcəb Tayyib Ərdoğan Misirdən qayıdarkən təyyarədə jurnalistlərin suallarını cavablandırarkən deyib.
Dövlət başçısı vurğulayıb ki, beynəlxalq birlik artıq bu faktı nəzərdən qaçıra bilməz.
Ərdoğan bildirib ki, səfər Misir prezidenti Əbdülfəttah əs-Sisinin təkidindən sonra baş tutub.
“Türkiyə və Misir regionun iki mühüm ölkəsidir. 12 il idi ki, əlaqələrimiz kəsilmişdi. Dünya Çempionatı zamanı Qətər əmiri Şeyx Təmimin vasitəçiliyi ilə orada bir araya gəldik və normallaşma prosesinə başladıq. Misir səfəri cənab Sisinin təkidli dəvəti ilə baş tutub. Təklif etdim ki, bizim Yüksək Səviyyəli Strateji Şura iclasımız keçirilsin və bu addım atılsın. Onlar bunu qəbul etdilər. Çox güman ki, cənab Sisi aprel və mayında Ankaraya səfərə gələcək”, – deyə o bildirib.
Ərdoğan Misirlə yeni dönəmin möhkəm təməllər üzərində qurulduğuna diqqət çəkib.
“Bizim Misirlə həm mədəni, həm də tarixi baxımdan köklü əlaqələrimiz var. Biz Misirlə təkcə eyni tarixi deyil, eyni dənizi paylaşırıq və o dənizin qlobal bərabərlikdəki əhəmiyyəti günü-gündən artır. Digər tərəfdən, xarici siyasət qarşılıqlı maraqlar əsasında qurulur və bu əsasda idarə olunur. Ona görə də, şübhəsiz ki, birgə və eyni istiqamətdə sinxron addımlar atmaq iki ölkənin maraqlarına uyğundur. Biz də, Misir tərəfi də bu reallığın fərqindəyik və yeni dövr bu möhkəm təməl üzərində qurulur.
Qarşıda bizi çox kritik sınaqlar gözləyir və biz bilmirik ki, gələcəkdə dünyanı hansı gözlənilməz və çətin proseslər gözləyir. Ona görə də həm bölgəmizdə, həm də dünyada sülh və əmin-amanlığı qorumaq üçün bundan sonra bir yerdə olmalıyıq. Qarşıda hər iki ölkəni inkişaf etdirəcək əməkdaşlıq sahələri var və yeri gələndə addımlar atılacaq”, – Ərdoğan əlavə edib.
Türkiyə lideri təəssüflə qeyd edib ki, ABŞ-ın mənfi yanaşması səbəbindən Qəzza zolağında atəşkəs çağırışları nəticəsiz qalır. “ABŞ guya problemi həll etmək üçün bölgəyə bir sıra yüksək rütbəli məmurları göndərdiyini iddia etsə də, hələ də nəzərəçarpacaq nəticələr əldə olunmayıb. Mövcud vəziyyətə baxmayaraq, atəşkəs və sülh üçün səylərimizi davam etdiririk, çünki buna alternativ görmürük”, – deyə Ərdoğan bildirib.
Onun sözlərinə görə, Türkiyə Qəzzada qətliamın dayandırılması və Fələstin məsələsinin yekun və davamlı həllinə nail olmaq üçün Misirlə əməkdaşlığı genişləndirmək niyyətindədir. Ərdoğan Ankara və Qahirənin razılaşdırılmış fəaliyyətlərinin regionda sülh, əmin-amanlıq və sabitliyə mühüm töhfə verəcəyinə əminliyini ifadə edib.
O, Qəzza zolağına humanitar yardımın çatdırılmasında müsbət dəyişikliklərə işarə edib. Dövlət başçısı əlavə edib ki, bu mövzunu Misir prezidenti Əbdülfəttah əs-Sisi ilə müzakirə edib və o, Qahirənin “İsrailə təzyiqi davam etdirməyə” hazır olduğunu bildirib:
“İlk növbədə, biz həm prezident Sisi, həm də BMT-nin baş katibi Antonio Quterreşlə müzakirələrdə iştirak edəcəyik. ABŞ rəsmiləri də bununla bağlı İsrailə təzyiqlərini davam etdirəcəklərini bildirirlər”.
Ərdoğan Qəzzaya humanitar yardımla gələn TIR-ların sayının 200-250-yə çatdığını, lakin bunun kifayət etmədiyini vurğulayıb. Onun sözlərinə görə, bu rəqəm 500-600 yük maşınına çatana qədər, eksklav sakinlərinin tələbatının ödənilməsində əhəmiyyətli irəliləyiş əldə etmək mümkün deyil.
Ərdoğan əlavə edib ki, İsrailin Qəzzaya qarşı mülki vətəndaşların ölümünə səbəb olan zərbələri “əsas vicdan əskikliyini əks etdirir”. “Bölgədəki mülki əhalinin təhlükəsizliyi pozulmamalıdır. “Qəzzanı bombalamazdan əvvəl mülki şəxslərin “təhlükəsiz zona”ya göndərilməsi humanitar dəyərlərə, müharibə qanunlarına, beynəlxalq hüquqa və insan haqlarına uyğundurmu?”, o deyib.
Gununsesi.info
