“Vaxtilə ikili standartlarda ittiham etdiyi qərb institutlarından biri — Avropa İnsan Hüquqları Məhkəməsi Ramiz Mehdiyevin xeyrinə, əslində isə Azərbaycan dövlətinin xeyrinə qərar verdiyini bəlkə də çoxları bilmir.
Bəli, Ramiz Mehdiyev çox nadir məmurlardandır ki, təkcə yerli məhkəmələrdə deyil, Avropa İnsan Hüquqları Məhkəməsində də uğur qazanıb”.
Gununsesi.info bildirir ki, bunu tanınmış vəkil Cavad Cavadov deyib.
Vəkilin sözlərinə görə, Strasburq Məhkəməsi “Xural” qəzeti və Əvəz Zeynallının şikayəti üzrə qərarında qeyd edib ki, ifadə azadlığı hüququ ilə yüksək vəzifəli dövlət məmurunun reputasiyası arasında balanslaşdırma aparılmalıdır.
“Söhbət Xural qəzeti və Əvəz Zeynallının şikayətindən gedir. (qərarın mətni burdadır: https://hudoc.echr.coe.int/eng?i=001-219482)”.
Vəkil qərarın qısa şərhini də təqdim edib:
“Xural qəzeti 23 may 2010-cu ildə dərc edilmiş məqalədə Ramiz Mehdiyev-in (o zaman Prezident Administrasiyasının rəhbəri) haqqında “parlament seçkilərinə müdaxilə etmək”, “özünə yaxın poet – Bəxtiyar Vahabzadə–in mandatını ləğv etdirmək”, “Şəki icra başçısının qarşısında baş qaldırmaqla iğtişaş təşkil etmək” kimi iddialar irəli sürmüşdü.
Məqalədə irəli sürülən iddialar əsasən “konkret şəxs, tarix, hadisə” formasında təqdim edilmişdi – yəni sadəcə fikir və dəyər şərhi deyil, faktların iddia edilməsi idi.
Qəzet həmin iddiaları sübut etmək üçün kifayət qədər əsas və ya etibarlı mənbə təqdim etməmişdi. Məhkəmə qeyd edib ki, qəzet “məlumatın doğruluğunu yoxlamaq” öhdəliyini yerinə yetirməmişdir.
Avropa Məhkəməsi belə qərara gəlib ki, burada qəzetin ifadə azadlığı hüququ (Avropa İnsan Hüquqları Konvensiyasının 10-cu maddəsi) və yüksək vəzifəli dövlət məmurunun reputasiyası arasında balanslaşdırma işi aparılmalıdır.
Qərarda bildirilir ki, məqalədə müzakirə edilən mövzu ictimai maraq yaradırdı (parlament seçkisi, dövlət məmuru, ictimai rəylə bağlı situasiya) və Ramiz Mehdiyev yüksək vəzifəli məmur olduğundan ona qarşı tənqidə məhz normaldan daha yüksək səbir göstərilməli idi.
Lakin məqalədə irəli sürülən iddiaların əsaslı olması, etibarlı mənbəyə əsaslanması yox idi; qəzet jurnalistikanın etik öhdəliklərini — məlumatın doğruluğunu təsdiqləmək, məsuliyyətlə davranmaq — yerinə yetirməmişdi. Avropa Məhkəməsi qəzetin bu öhdəlikləri pozduğunu və nəticədə ifadə azadlığı hüququnun pozulmadığını qərarlaşdırdı.
Nəticədə, Avropa Məhkəməsi ifadə azadlığı hüququnun pozulmadığına qərar verib — yəni, qəzetin məqaləyə görə məsuliyyətə cəlb olunması Konvensiyanın 10-cu maddəsinə zidd sayılmamışdır.
Gununsesi.info
