“Qarabağ”ın UEFA Konfrans Liqasının 3-cü təsnifat mərhələsində Kiyev “Dinamo”su ilə Bakıda keçiriləcək cavab oyunu üçün biletlər bu gün satışa çıxacaq.
Gununsesi.info xəbər verir ki, bu barədə “Qarabağ” klubunun mətbuat xidməti məlumat yayıb. Biletlər bu gün saat 12:00-dan satışda olacaq.
Standart biletlərin qiyməti 5, 10, 15 və 20 AZN olacaq. VIP sektorlar üçün biletlər 50, 75 və 100 AZN, VVIP sektor üçün isə 150 AZN təşkil edəcək.
Biletləri yalnız iTicket.az-ın rəsmi saytı və mobil tətbiqi vasitəsilə əldə etmək mümkün olacaq. Onlayn alış zamanı çətinlik yaranarsa, azarkeşlər iTicket.az-ın satış məntəqələrinə, Park Bulvardakı “Qarabağ” FK Fan Şopuna və Tofiq Bəhramov adına Respublika stadionunun kassalarına müraciət edə bilərlər.
Stadiona giriş yalnız etibarlı QR kodlu biletlə mümkün olacaq.
Qeyd edək ki, avqustun 13-də Tofiq Bəhramov adına Respublika stadionunda keçiriləcək oyun saat 20:00-da başlayacaq. Komandaların ilk oyunu isə bu gün Polşanın Lublin şəhərindəki “Lublin Arena”da keçiriləcək və Bakı vaxtı ilə saat 21:00-da start götürəcək.
