Oktyabrın 21-də Bakı Ağır Cinayətlər Məhkəməsində , hakim Əlövsət Abbasovun sədrliyi ilə Taleh Bağırov, Fuad Qəhrəmanlı və digərlərinin cinayət işi üzrə məhkəmə prosesi davam etdirilib.
Gununsesi.info xəbər verir ki, proses zamanı təqsirləndirilən şəxslər hadisə günü xəsarət almaları haqqında ekspertizanı həyata keçirən şəxsdən narazılıqlarını bildiriblər.
Onlar qeyd ediblər ki, ekspert xəsarətləri qeydə almır. Hakim deyib ki, hələ ekspertiza rəyi məhkəməyə gəlmədiyi üçün bu haqda nəsə edə bilməzlər.
Vəsatətlə çıxış edən vəkil Yalçın İmanov bildirib ki, Baş Mütəşəkkil Cinayətkarlıqla Mübarizə İdarəsinə sorğu ilə müraciət edərək, Nardaranda keçirilən əməliyyatda neçə nəfərin iştirak etməsi və onlarda hansı silahların olmasını öyrənməyə çalışıb. Lakin buna cavab da verilməyib. Vəkil sorğunun məhkəmə adından həmin idarəyə göndərilməsini istəyib.
Vəkillər zərərçəkmiş polis əməkdaşı İbrahim Kazımovun növbəti dəfə məhkəməyə çağırılması haqqında da vəsatət qaldırıblar. Prokuror isə vəsatətin təmin edilməməsini istəyib. O bildirib ki, İ. Kazımov iki dəfə məhkəmədə dindirilib. Bu isə təqsirləndirilən şəxslərin narazılığına səbəb olub. Hakim vəsatətə sonra münasibət bildirəcəklərini deyib.
Daha sonra prosesdə şahid qismində Sabunçu rayon Polis İdarəsinin (RPİ) əməkdaşı Nadir Vəliyev ifadə verib. Bildirib ki, ötən il noyabrın 5-də bir qrup şəxs polis idarəsinin qarşısına toplaşıb Elçin Qasımovun azadlığa buraxılmasını istəyib. O, ərazidə daş parçaları görsə də, onu kimin atdığını bilmədiyini deyib. Bildirib ki, hadisə zamanı polis əməkdaşlarının xəsarət almasından xəbəri var.
Sabunçu Rayon Polis İdarəsinin ifadə verən digər əməkdaşı Şahbaz Orucov deyib ki, N. Vəliyev ifadə verən zaman yan otaqda onun dediklərini eşidib və onun dedikləriylə razılaşdığını bildirib. Vəkillər isə buna etiraz ediblər. Hakim digər şahidin ifadəsini eşitdiyinə və bu ifadələri təkrarladığına görə Ş. Orucovun şahidlik statusuna məhkəmə tərəfindən xitam verildiyini elan edib.
Sabunçu RPİ-nin əməkdaşı Cavid Qafarov isə ifadəsində deyib ki, həmin vaxt futbolda olub, idarəyə çağırıldığı üçün gəlib və hər hansı qarşıdurmanın şahidi olmayıb.
Sabunçu rayon RPİ-nin əməkdaşı Eyvaz Hüseynov isə idarənin qarşısında daş parçaları görsə də, kimin atdığını bilmədiyini deyib. Polis əməkdaşı Ruslan Məhərrəmov da oxşar ifadə verib. İclas günün ikinci yarısında davam edəcək.
Proses günün ikinci yarısında davam edəcək.
Qeyd edək ki, T. Bağırov Cinayət Məcəlləsinin 120-ci (qəsdən adam öldürmə) maddəsinin 120.2.1, 120.2.3, 120.2.4, 120.2.7, 120.2.12, 29,120-ci (qəsdən adam öldürməyə cəhd) maddəsinin 29, 120. 2.1, 29,120.2.3, 29, 120.2.4, 29,120.2.7, 29, 120. 2. 12, 228.3-cü (qanunsuz olaraq odlu silah əldə etmə), 228.4-cü (qanunsuz olaraq silah gəzdirmə) və digər maddələri ilə ittiham olunur. Ötən il noyabrın 26-da hüquq-mühafizə orqanlarının əməkdaşlarının Bakının Nardaran qəsəbəsində keçirdikləri xüsusi əməliyyat zamanı T. Bağırov da daxil olmaqla 60-dan çox şəxs saxlanılıb. Həmin şəxslərdən bir neçəsinin cinayət işi digərlərindən ayrılaraq Sabunçu rayon Məhkəməsinə göndərilib, barələrində müvafiq hökmlər çıxarılıb.
AXCP sədrinin müavini F. Qəhrəmanlı isə ötən il dekabrın 8-də həbs edilib. O, Cinayət Məcəlləsinin 281-ci (dövlət əleyhinə açıq çağırışlar), 283-cü ( milli, irqi, sosial və ya dini nifrət və düşmənçiliyin salınması) və 220.2-ci (hakimiyyət nümayəndəsinin qanuni tələblərinə fəal şəkildə tabe olmamağa və kütləvi iğtişaşlara, habelə vətəndaşlara qarşı zorakılıq etməyə çağırışlar etmə) maddələri ilə ittiham olunur.
Gülnaz Qənnbərli
Gununsesi.info
