ABŞ-ın Nyu-Cersi ştatında türk vətəndaşa ilk dəfə yaşadığı şəhərin açarı verilib.
Gununsesi.info xəbər verir ki, türk əhalinin ən sıx olduğu Nyu-Cersi ştatının Paterson şəhərində yaşayan iş adamı Hüseyn Bayrama şəhərin açarını bələdiyyə sədri Andre Sayeq təqdim edib.
“Biz görkəmli icma lideri və Toros restoranlarının sahibi Hüseyn Bayramı şəhərin açarı ilə təltif edirik. Bu mötəbər mükafat Bayramın sahibkarlıq səyləri və xeyriyyəçiliyə sarsılmaz bağlılığı ilə cəmiyyətə verdiyi qeyri-adi töhfələri qiymətləndirir”, – bələdiyyənin mətbuat xidmətindən bildirilib.
Açıqlamada türk sahibkarın xüsusilə Covid-19 epidemiyası zamanı ehtiyacı olan 10 mindən çox insana ərzaq yardımı etdiyi, həmçinin Nyu-Yorkdakı bəzi xəstəxana işçilərinə ərzaq yardımı etdiyi, təcili yardım qruplarına maska və əlcəklər payladığı vurğulanıb.
ABŞ-da əyalət hökumətinə tabe olan şəhər hökumətləri etibar qazanmış, cəmiyyət üçün faydalı fəaliyyətlərdə iştirak etmiş və yüksək nailiyyətlər əldə etmiş şəxsləri bəziləri ildə bir dəfə “şəhərin açarı” ilə mükafatlandırır.
Hüseyn Bayram Nyu-Cersidə həm ştatda, həm də Paterson şəhərində bu simvolik mükafatı alan ilk türk vətəndaşıdır.
Uzun illər əvvəl Giresundan ABŞ-a gələn və ailə biznesi olaraq başladığı biznesin filiallarını açan Hüseyn Bayram türk-amerikan icmasının fəal üzvləri arasındadır.
Hüseyn Bayram, eyni zamanda, təxminən 150 min əhalisi ilə ABŞ-ın ən böyük türk icmasını təşkil edən Türk Amerika Giresun Təşkilatının prezidenti vəzifəsini də icra edir.
Keçmiş Paterson Bələdiyyə Başçısı Ceyn Uilyams-Uorrenin köməkçisi də olmuş Bayram ABŞ-da yerli siyasətdə iştirak edən türk icmasının nadir üzvlərindəndir.
Gununsesi.info
