ABŞ Əş-Şəbab terror təşkilatına qarşı mübarizə aparmaq üçün Somalidə 5 hərbi baza tikəcək.
Gununsesi.info xəbər verir ki, Somali Müdafiə Nazirliyi ilə ABŞ-ın Moqadişudakı səfirliyi arasında anlaşma memorandumu imzalanıb.
İmzalanma mərasimində hər iki tərəfdən yüksək səviyyəli rəsmilər, o cümlədən Somali prezidenti Həsən Şeyx Məhəmməd və ABŞ dövlət katibinin Afrika məsələləri üzrə köməkçisi Molli Fi iştirak edib.
İmzalanan anlaşma memorandumu çərçivəsində ABŞ Somalidə Əl-Şəbabla mübarizədə 5 hərbi baza quracaq.
ABŞ əsgərlərinin yerləşdirilməsi ilə yanaşı, Somali ordusunun Danab Briqadası ilə əlaqəli olacaq hərbi bazalarda Somali əsgərləri üçün hərbi təlim fəaliyyətləri də həyata keçiriləcək.
ABŞ-ın baza yaratmaq qərarının Afrika İttifaqının Keçid Missiyasının (ATMIS) Somalidən çıxarılması planından sonra gəlməsi diqqət çəkir.
Əl-Şəbab 2007-ci ildən Somali hökumətinə və Afrika İttifaqı qüvvələrinə hücum edir və tez-tez şəhərlərdə və kənd yerlərində terror hücumları təşkil edir.
Somali prezidenti Mahmud vəzifəyə gəldiyi 2022-ci ildən bəri Əl-Şəbabla mübarizəni sürətləndirib.
ABŞ Moqadişu hökumətinin təşkilata qarşı mübarizəsini dəstəkləmək üçün orduya hava dəstəyi ilə yanaşı, hərbi təlimlər də verir.
Gununsesi.info
