ABŞ Rusiyanın Ukraynaya təcavüzünün ikinci ildönümü ilə bağlı tədbirlər çərçivəsində bu gün 500-dən çox obyektə sanksiya tətbiq edəcək.
Gununsesi.info xəbər verir ki, bu barədə “Reuters” agentliyinə müsahibəsində ABŞ maliyyə nazirinin müavini Uolli Adeyemo bildirib.
Adeyemo digər ölkələrlə ortaq şəkildə həyata keçirilən tədbirlərin Vaşinqtonun Rusiyanı müharibəyə və müxalifət lideri Aleksey Navalnının ölümünə görə məsuliyyətə cəlb etmək səyləri fonunda Rusiyanın ehtiyac duyduğu mallara çıxışını asanlaşdıran üçüncü ölkələrdəki Rusiya hərbi-sənaye kompleksini və şirkətlərini hədəf alacağını söyləyib.
Bu paket Rusiyanın 2022-ci ildə Ukraynaya müdaxiləsindən sonra ABŞ və müttəfiqlərinin Moskvaya qarşı elan etdiyi minlərlə sanksiyaların sonuncusu olacaq.
Yeni sanksiyalar ABŞ Konqresinin Kiyevə əlavə təhlükəsizlik yardımını təsdiq edib-etməyəcəyinə dair şübhələrə baxmayaraq, ABŞ və müttəfiqlərinin Rusiyaya təzyiqlərini davam etdirməyə çalışdıqları bir vaxta təsadüf edir.
Prezident Co Baydenin administrasiyası Ukrayna üçün əvvəllər təsdiq edilmiş pulları tükətdi və daha çox vəsait tələbi Respublikaçıların nəzarətində olan Nümayəndələr Palatasındadır.
“Sanksiyalar və ixraca nəzarət Rusiyanı ləngitmək məqsədi daşıyır və onun Ukraynada seçdiyi müharibə ilə mübarizə aparmasını çətinləşdirir”, – Adeyemo bildirib.
“Ancaq son nəticədə Ukraynanı yoluna qoymaq, ona özünü müdafiə etmək imkanı vermək üçün Konqres Ukraynaya lazım olan resursları və silahları vermək üçün hərəkətə keçməlidir”, o əlavə edib.
Xatırladaq ki, fevralın 22-də ABŞ Ədliyyə Nazirliyi sanksiyalara məruz qalmış rusiyalı oliqarxlara və Kremlə və onun hərbçilərinə dəstək verməkdə ittiham olunan digər şəxslərə qarşı bir sıra cinayət və mülki tədbirlər haqqında məlumat verib.
Daha əvvəl məlum olmuşdu ki, ABŞ müsadirə edilmiş Rusiya aktivlərinin 500 min dollarını Ukraynaya dəstək məqsədilə istifadə etmək üçün Estoniyaya köçürəcək.
Gununsesi.info
