Azərbaycanın Ermənistanla Laçın sərhəddində nəzarət buraxılış məntəqəsi qurmasından sonra iki ölkə arasında sülh danışıqlarının dalana dirənəcəyi barədə Rusiya KİV-lərinin proqnozu özünü doğrultmadı.
Əksinə, AŞ ölkələrinin Reykyavik sammitində Nikol Paşinyan Azərbaycanın ərazi bütövlüyünü tanıdıqlarını bəyan edib.
Son günlər ABŞ və Avropa İttifaqı Qarabağ məsələsi ilə bağlı yekun mövqeyini ifadə edib.
Gununsesi.info-nun xəbərinə görə, ABŞ Dövlət Departamentinin mətbuat katibi Metyu Millerin (Matthew Miller) mayın 30-da bəyanat yayıb.
“Biz Ermənistanla Azərbaycan arasında danışıqların davam etdiyini görməkdən məmnunuq” deyə bildirilən bəyanatda daha sonra deyilir:
“Dövlət katibi (Entoni) Blinkenin dediyi kimi, Cənubi Qafqazda sülhə nail olmaq mümkündür. Biz bu yaxınlarda baş nazir (Nikol) Paşinyanın sülhə sadiqliyini yüksək qiymətləndirdik və prezident (İlham) Əliyevin amnistiya ilə bağlı son açıqlamalarını alqışlayırıq. Ermənistan və Azərbaycan liderləri bu həftənin sonunda Kişinyovda avropalı tərəfdaşlarımızla görüşəcək. Ümid edirik ki, bu, məsələlərin zorakılıq yolu deyil, danışıqlar masası arxasında həlli yönündə məhsuldar addım olacaq. Aqressiv ritorika yalnız keçmişin zorakılığını möhkəmləndirə bilər; həm ictimai, həm də özəl yollarla konstruktiv dialoq isə sülh, fürsət və ümid yarada bilər. Birləşmiş Ştatlar davamlı və layiqli sülh sazişi bağlamaq üçün hər iki tərəfin səylərini dəstəkləməyə hazırdır“.
Azərbaycan prezidenti İlham Əliyev və Ermənistan baş naziri Nikol Paşinyanla Kişinyovda Ermənistan-Azərbaycan danışıqlarının davamını səbirsizliklə gözləyirəm”.
Avropa İttifaqı Şurasının rəhbəri iki ölkənin bir-birinin suverenliyini və ərazi bütövlüyünü tanımasını, sərhədlərin delimitasiyasında irəliləyişi, habelə sərhədyanı bölgələrdə risklərin azaldılmasının mühümlüyünü bir daha vurğulayıb: “Bakı ilə keçmiş DQMV-də yaşayan ermənilər arasında onların hüquqları və təhlükəsizliyinə dair dialoq həlledici əhəmiyyətə malikdir”.
Avropa İttifaqı Şurası rəhbərinin fikrincə, “maksimalist mövqelərdən çəkinmək və dialoqa can atmaq” mühümdür:
“30 ildən çox davam etmiş münaqişədən sonra yaraların sağalmasına vaxt tələb olunur. Cəsarətli qərarlar zəruridir”.
Qeyd edək ki, Azərbaycan və Ermənistan liderləri iyunun 1-də Kişinyovda Avropa Siyasi İcmasının sammitində iştirak edəcəklər.
Burada İlham Əliyev və Nikol Paşinyan arasında Şarl Mişelin, habelə Fransa prezidenti Emmanuel Makron və Almaniya kansleri Olaf Şoltsun iştirakı ilə beştərəfli görüşün keçirilməsi gözlənilir.
Bundan əvvəl Azərbaycanın Fransadakı səfiri bildirmişdi ki, Kişinyovda iki ölkə arasında sülh müqaviləsi imzalana bilər.
Yerevan isə bəyan etmişdi ki, sülh müqaviləsinin imzalanması bu görüşün gündəliyinə daxil edilməyib.
Baş nazir Nikol Paşinyan demişdi ki, Azərbaycan sülh müqaviləsi ilə bağlı Yerevanın son təkliflərinə hələ ki, cavab verməyib.
Avropa İttifaqı da bəyanat yayıb
Kişinyovda keçirilməsi planlaşdırılan görüşün ərəfəsində Avropa İttifaqı Azərbaycan və Ermənistan arasında münasibətlərin normallaşdırılması prosesində son vaxtlar nəzərə çarpan fəallığı alqışlayan bəyanat verib.
Avropa İttifaqı Xarici Siyasət Xidmətinin bəyanatında tərəflərə sülh prosesinə ziyan vura biləcək bəyanatlardan çəkinmək tövsiyə olunur:
“Bu tarixi iləliləyişi saxlamaq və sülh prosesini, düşmən ritorika da daxil, təhlükə altında qoya biləcək addımlardan çəkinmək mühümdür”.
Bəyanatda xatırladılır ki, mayın 14-də Avropa İttifaqı Şurası prezidentinin vasitəçiliyi ilə Brüsseldə keçirilən danışıqlarda Azərbaycan və Ermənistanın liderləri diqqətlərini sərhəd məsələləri, kommunikasiyalar, humanitar məsələlər, habelə Qarabağda yaşayan ermənilərin hüquq və təhlükəsizliyi kimi məsələlərə yönəldiblər.
Aİ bildirir ki, iki ölkə arasında münasibətlərin normallaşdırılması prosesinə dəstək verilməsinə sadiq qalacaq.
Elmar Elnuroğlu
Gununsesi.info
