Azərbaycan Dövlət Pedaqoji Universitetində (ADPU) tədris-yardımçı heyətin bilik və peşəkarlıq səviyyəsinin yoxlanılması başa çatıb.
Bu barədə Gununsesi.info-ya ADPU-nun ictimaiyyətlə əlaqələr şöbəsinin rəhbəri Mənsur İbrahimli məlumat verib.
Onun sözlərinə görə, ADPU-nun kafedralarında tədris olunan fənlər üzrə professor, dosent, baş müəllim və müəllim vəzifələrini tutmaq üçün keçirilən müsabiqə ilə yanaşı, tədris-yardımçı heyətin də yoxlanılması keçirilib. “Bu müsabiqəyə ADPU-nun rektoru, professor Cəfər Cəfərovun müvafiq əmri ilə İnsan resursları şöbəsi tərəfindən aprelin 25-dən başlayaraq universitetdə tədris-yardımçı heyətin: tədris laboratoriya müdirlərinin, tyutorların, laborantların, baş laborantların, tədris ustalarının, operatorların və Kitabxana-İnformasiya Mərkəzinin əməkdaşlarının bilik və peşəkarlıq səviyyəsinin yoxlanılmasına başlanılıb. Məqsəd onların peşəkarlıq səviyyəsinin müəyyən edilməsi və təhsilin keyfiyyətinin yüksəldilməsidir. Yoxlamaya ümumilikdə 247 nəfər cəlb edilib”- deyə, M. İbrahimli vurğulayıb.
O bildirib ki, yoxlama iki mərhələdə aparılıb: “Birinci mərhələdə hər bir qrupu 14 nəfərdən ibarət olan tədris-yardımçı heyətin informasiya-kommunikasiya texnologiyaları (İKT) sahəsində bilik və bacarıqları yoxlanılıb. Yoxlamanın ikinci mərhələsi isə yazılı şəkildə aparılıb. Mayın 3-də keçirilən yazılı mərhələdə tədris-yardımçı heyətin ümumi elmi-nəzəri səviyyəsi, ixtisas bilikləri, eyni zamanda qanunvericiliklə bağlı bilikləri, məntiqləri, dünyagörüşləri respublikamızın tanınmış və nüfuzlu mütəxəssislərin iştirakı ilə yoxlanılıb”.
M İbrahimli deyib ki, yoxlama prosesinin gedişini ADPU-nun rektoru, professor Cəfər Cəfərov da izləyib. Sonda M. İbrahimli deyib ki, obyektiv və şəffaf keçirilən yoxlama prosesinin nəticələrindən asılı olaraq hər bir işçi barədə fərdi qaydada müvafiq qərar qəbul edilib.
Mürtəza
Gununsesi.info
