Almaniya Moskva yaxınlığındakı Krasnoqorskdakı “Crocus City Hall” konsert zalında törədilən terror aktı nəticəsində həlak olanların ailələrinə başsağlığı verir və terrorizmin bütün növlərini pisləyir.
Gununsesi.info xəbər verir ki, bu barədə Almaniyanın xarici işlər naziri Annalena Berbok şənbə günü, martın 23-də X sosial şəbəkəsində yazıb.
“Biz Moskvada terror aktı qurbanlarının ailələri ilə birlikdə yas tuturuq. Sadəcə olaraq rok konsertinə getmək istəyən günahsız insanlar soyuqqanlılıqla qətlə yetirildi. Biz qorxaq, qeyri-insani terroru – istənilən yerdə qınayırıq. Biz Rusiya xalqına rəğbət bəsləyirik”, – deyə XİN rəhbəri qeyd edib.
Bundan əvvəl Moskva yaxınlığındakı Krasnoqorskda törədilən terror aktını Almaniya Xarici İşlər Nazirliyi şərh edib.
Martın 22-də axşam saatlarında pulemyotlarla silahlanmış naməlum şəxslər Moskva yaxınlığındakı Krasnoqorskda “Crocus City Hall”un konsert zalına soxularaq atəş açıblar. Otaqda yanğın başlayıb. Əməliyyat xidmətləri binada partlayışlar barədə məlumat verib.
Hücum nəticəsində 115 nəfər ölüb, 120-dən çox insan yaralanıb. Rusiya Federasiyasının İstintaq Komitəsi xəbərdarlıq edib ki, qurbanların sayı arta bilər. Faktla bağlı Rusiya Federasiyası Cinayət Məcəlləsinin 205-ci (terror aktı) maddəsi ilə cinayət işi başlanıb.
“Crocus Siti Hall”da baş verən yanğın praktiki olaraq söndürülüb, konstruksiyaların dağılması və dağıntıların çıxarılması davam edir, Moskva vilayətinin qubernatoru Andrey Vorobyov bildirib. Yanğın sahəsi 12,9 min kvadratmetr təşkil edib. Konsert zalının üzərindəki dam örtüyü uçub.
Rusiyanın regionları, o cümlədən Moskva və bölgə idman, mədəni və digər kütləvi tədbirləri ləğv edir. Paytaxt hava limanlarında təhlükəsizlik tədbirləri gücləndirilib. Rusiya Dəmir Yolları qatarlarda və dəmiryol stansiyalarında təhlükəsizlik tədbirlərinin gücləndirildiyini açıqlayıb.
Rusiya Federal Təhlükəsizlik Xidmətinin direktoru Aleksandr Bortnikov prezident Vladimir Putinə “Crocus City Hall”da terror aktında iştirak edən 4 terrorçu da daxil olmaqla 11 nəfərin saxlanılması barədə məlumat verib.
Gununsesi.info
