Amerikalı respublikaçı senator Pit Riketts bildirib ki, ABŞ və müttəfiqləri Rusiya prezidenti Vladimir Putini dayandırmaqda Ukraynaya kömək etməlidir, çünki əks halda bu, ABŞ üçün daha böyük xərclərə səbəb olacaq.
Gununsesi.info xəbər verir ki, senator bu barədə Atlantika Şurasının analitik mərkəzinin Mərkəzi Avropa həftəsinə həsr olunmuş konfransı zamanı bildirib.
O, Putinlə Hitleri müqayisə edərək, Kreml rəhbərinin Moskva çarı I Pyotrun uğurlarını sınadığını, Rusiya imperiyasına həsrətlə yanaşdığını və Hitlerin “Almaniyadan kənardakı almanlar”la bağlı tezislərinə bənzər tezislər səsləndirdiyini, “Rusiyadan kənardakı rusları” qorumaq zərurətindən danışıb.
“Əgər Putin Ukraynada uğur qazansa və sonra Baltikyanı ölkələri işğal etmək qərarına gəlsə, bu, 3-cü Dünya Müharibəsi olacaq və oğlunuz Avropada döyüşəcək”, – Riketts deyib.
Senator vurğulayıb ki, dünya Hitlerin sözlərini ilk vaxtlarda ciddi qəbul etsəydi, İkinci Dünya Müharibəsinin milyonlarla qurbanını xilas etmək olardı, ona görə də müttəfiq dövlətlər indi Putinin təhdidlərinin reallığını dərk etməlidirlər.
“Hesab edirəm ki, bu, amerikalılara çatdırmalı olduğumuz mesajdır: baxın, bu bizim maraqlarımızdadır. Biz Ukraynaya kömək edirik ki, oğlan və qızlarımız Avropada bir daha müharibədə vuruşmasınlar. Biz bunun qarşısını almağa çalışırıq”, – deyə o yekunlaşdırıb.
Bundan əvvəl ABŞ dövlət katibinin müavini Ceyms O’Brayen demişdi ki, Ukraynaya kömək etmək ABŞ-ın maraqlarına uyğundur və onun dəstəyini indi dayandırmaq pis qərar olardı.
Maliyyələşdirmənin gecikməsi ABŞ-ı Ukraynaya hərbi yardım axınını məhdudlaşdırmağa məcbur edib, çünki Pentaqonun ölkəyə göndərdiyi silahları doldurmaq üçün cəmi 1 milyard dollar qalıb.
Bundan əvvəl Ağ Evin Milli Təhlükəsizlik Şurasının strateji kommunikasiyalar üzrə koordinatoru Con Kirbi ABŞ-ın Ukraynaya yardım üçün Konqresin təsdiq etdiyi vəsaitlərin demək olar ki, hamısını istifadə etdiyini bildirmişdi.
Gununsesi.info
