ABŞ Beynəlxalq Ticarət Komissiyası “Apple”ın ən yeni ağıllı saat modelləri olan “Apple Watch Ultra 2” və “Apple Watch Series 9″un satışını Masimonun patentlərini pozduğu əsas gətirərək qadağan edib.
Gununsesi.info xəbər verir ki, ABŞ Beynəlxalq Ticarət Komissiyasının Oktyabr ayında tibbi monitorinq texnologiyası şirkəti Masimo-nun şikayətindən sonra Apple-a sözügedən ağıllı saatların idxalını və satışını dayandırmağı əmr edən qərarına ABŞ prezidenti Co Baydenin administrasiyası veto qoymayıb. Dekabrın 25-nə qədər veto hüququ olan Bayden administrasiyası qərara veto qoymadığından, “Apple”ın ən yeni ağıllı saat modelləri “Apple Watch Ultra 2” və “Watch Series 9″un ölkədə satışı qadağan edilib.
ABŞ Ticarət Nümayəndəliyinin (USTR) verdiyi açıqlamada xatırladılıb ki, ABŞ Beynəlxalq Ticarət Komissiyası “Apple”-ın ABŞ-da yerləşən “Masimo” və “Cercacor Laboratories”ə məxsus iki patenti pozduğunu müəyyən edib. Açıqlamada diqqətli məsləhətləşmələrdən sonra ABŞ Beynəlxalq Ticarət Komissiyasının qərarının ləğv olunmayacağına qərar verildiyi və sözügedən qərarın bu gündən etibarən yekunlaşdığı bildirilib.
“Apple” qərardan ABŞ Federal Apellyasiya Məhkəməsinə şikayət edib. Qərarın dayandırılmasını tələb edən Apple, yanvarın 12-dək saatların yenidən dizayn edilmiş versiyalarının Masimonun patentlərini pozub-pozmadığına qərar verəcək ABŞ Gömrük və Sərhəd Mühafizəsinin qiymətləndirməsini gözləməyi istəyib.
Beynəlxalq ticarət mübahisələrinə nəzarət edən ABŞ Beynəlxalq Ticarət Komissiyası oktyabr ayında “Apple Watch”un qanda oksigen səviyyəsini oxumaq qabiliyyətinin Masimonun nəbz oksimetrinin patentlərini pozduğuna qərar verib.
“Apple” dekabrın 18-də patent mübahisəsinə görə mağazalarında “Apple Watch Ultra 2” və “Apple Watch Series 9″un satışını dayandıracağını açıqlayıb. “Apple”ın aşağı qiymətli “Apple Watch SE” modeli kimi qan oksigen səviyyəsini oxuma xüsusiyyətini ehtiva etməyən ağıllı saat modellərinin bu mübahisədən təsirlənməyəcəyi ifadə edilib.
