Avropa Şurası Parlament Assambleyasının bu ay keçiriləcək sessiyasında Laçın dəhlizində sərbəst gediş-gəlişin təhlükəsizliyi məsələsinin gündəliyə salınacağı barədə məlumat yayılıb.
Gununsesi.info-nun xəbərinə görə, bu barədə Avropa Şurasından bildirilib.
Məlumata görə, sessiyanın ilk günündə bu məsələ gündəliyə təklif olunacaq.
Milli Məclisin deputatı Naqif Həmzəyev Gununsesi.info – ya açıqlamasında bu məsələnin AŞ PA gündəliyinə daxil edilməsində Ermənistanın və Ermənistanı dəstəkləyən lobbi qruplarının xüsusi rolu olduğunu deyib:
“Heç kəsə sirr deyil ki, Azərbaycan Laçın dəhlizində Qarabağda yaşayan ermənilərin təhlükəsizliyinə ən yüksək səviyyədə təminat verib. Onların sərbəst gediş-gəlişi ilə bağlı mətbuatda, sosial şəbəkələrdə kifayət qədər foto və video görüntülər yayılıb. Sadəcə bu məsələni gündəliyə gətirməklə guya Azərbaycanın Qarabağda yaşayan ermənilərə hansısa çətinliklər yaratdığı barədə fikirlər formalaşdırmaq istəyirlər. Hesab edirəm ki, Avropa Şurasında olan başqa ölkələrin parlamentariləri də bundan xəbərdardır. Onlar imkan verməyəcək ki, belə bir mənasız müzakirə sessiyanın gündəliyinə daxil edilsin. Hesab edirəm ki, bu tipli müzakirələr sülh prosesinə maneçilik yaradır”.
Şəbnəm
Gununsesi.info
