Avropa İttifaqı Rusiyaya qarşı iqtisadi sanksiyaları bir daha uzatdı

Avropa İttifaqı (Aİ) Şurası Rusiyanın Ukraynada sabitliyi pozmağa yönəlmiş hərəkətlərinə cavab olaraq 2014-cü ildə tətbiq edilən məhdudlaşdırıcı tədbirlərin iyulun 31-dək uzadıldığını açıqlayıb.

Gununsesi.info-nun xəbərinə görə, açıqalamda xatırladılır ki, 2022-ci ilin fevralında Rusiyanın Ukraynaya təcavüzündən sonra Aİ sanksiyaları əhəmiyyətli dərəcədə genişləndirilib.

Hazırda Aİ Rusiyaya qarşı 12 sanksiya paketi təqdim edib. Rusiyaya qarşı sanksiyalar ticarət, maliyyə, sənaye, texnologiya, nəqliyyat, ikili təyinatlı mallar və lüks mallar da daxil olmaqla geniş sahələri əhatə edir.

Bunlara Rusiyadan Aİ-yə dəniz yolu ilə neft və bəzi neft məhsullarının idxalına qadağa, bəzi Rusiya banklarının SWIFT beynəlxalq ödəniş sistemindən çıxarılması, həmçinin bir sıra televiziya və radio yayımlarının fəaliyyətinin dayandırılması daxildir.

Aİ-nin Rusiyaya qarşı iqtisadi sanksiyaları hər 6 aydan bir uzadılır. 2014-cü il martın 18-də Rusiya Krımı və Sevastopol şəhərini qanunsuz olaraq ilhaq edib. Aİ ilk dəfə 2014-cü ildə Rusiyaya qarşı iqtisadi sanksiyalar tətbiq etmək qərarına gəlib.

Gununsesi.info