Avropa İttifaqına (Aİ) üzv ölkələr Rusiya ilə vuruşan Ukraynaya hərbi yardım üçün istifadə olunan fondun 5 milyard avro artırılmasına prinsipial razılaşdıqlarını açıqlayıb.
Gununsesi.info xəbər verir ki, Aİ-nin dönəm sədrliyini həyata keçirən Belçikanın sosial mediada etdiyi paylaşımda “Avropa Sülh Fondu” adlı maliyyə fondunda islahat qərarının verildiyi bildirilib.
Məlumata görə, Aİ-yə üzv ölkələr islahatlar çərçivəsində Ukraynaya hərbi yardım üçün istifadə olunan fondun 5 milyard avro artırılmasına prinsipial razılıq veriblər.
Məlumatda deyilir ki, “Aİ Ukraynaya daimi dəstək vermək və ölkənin özünü müdafiə etməsi üçün lazım olan hərbi texnikanı təmin etməkdə qərarlıdır”.
Aİ-nin Xarici Əlaqələr və Təhlükəsizlik Siyasəti üzrə Ali Nümayəndəsi Cosep Borrel Aİ ölkələrinin razılaşdığı Ukraynaya yardım fondu çərçivəsində Ukraynaya hərbi dəstəyin daha 5 milyard avro artırılacağına diqqət çəkib.
“Mesaj aydındır: biz Ukraynaya qalib gəlmək üçün nə lazımdırsa onu dəstəkləyəcəyik”, – Borrell deyib.
Gununsesi.info
