Avropada Avropa İttifaqının (Aİ) kənd təsərrüfatı siyasətinə etiraz edən fermerlərin aksiyaları güclənir.
Gununsesi.info xəbər verir ki, Almaniya, Fransa, İspaniya, Belçika, Hollandiya, Polşa, İtaliya və Macarıstanda şəhərlərin əsas magistral və küçələri yüzlərlə traktorla bağlanıb.
Hər kəsin eyni tələbləri var: milli qanunvericiliyə və Avropa İttifaqı tərəfindən kənd təsərrüfatı sektorunda müəyyən edilmiş standartlara yenidən baxılması.
Bu etirazların ən güclü və ən böyüyü ilk dəfə 2019-cu ildə Hollandiyada, 2000-dən çox traktorun müxtəlif bölgələrdə nəqliyyatın hərəkətini kəsdiyi vaxt baş verib.
Hökumətə quru, dəniz və havanın çirklənməsinə səbəb olan azot emissiyalarını azaltmaq üçün kəskin tədbirlər görməyə çağıran müstəqil komitənin hesabatı təqdim edildikdən sonra fermerlər yolları bağlayıblar.
Keçən il Hollandiyanın liderliyindən sonra, Belçikadakı fermerlər ciddi Avropa ekoloji qaydalarına dəyişiklik edilməsini tələb etmək üçün Brüssel dairəvi yolunda nəqliyyatı bağladılar.
Son zamanlar oxşar etirazlar Avropanın yeni paytaxtlarına və şəhərlərinə yayılmağa başlayıb, bu dəfə daha genişmiqyaslı xarakter alıb və zorakılıqla müşayiət olunub.
Fermerlər Berlin, Paris və Roma ilə yanaşı, digər şəhərlərdə də əsas yolları traktorlarla bağlayaraq ictimaiyyətin diqqətini cəlb etməyə çalışır və Aİ-nin kənd təsərrüfatı siyasətləri səbəbindən gəlirlərin azalmasından şikayətlənirlər.
Xüsusilə, fermerlər qanunvericiliyin sərtləşdirilməsindən, dövlət dəstəyinin azaldılmasından, Rusiya-Ukrayna münaqişəsi fonunda enerji, yanacaq və gübrələrin baha olması, Ukraynadan ucuz taxıl məhsullarının idxalı və sudan istifadəyə qoyulan məhdudiyyətlərdən narazıdırlar.
Avropalı fermerlər həmçinin Aİ-ni “Yaşıl Sövdələşmə çərçivəsində karbon gübrələri və pestisidlərdən istifadə ilə bağlı sərt qaydalara” görə, istehsal prosesində çətinliklər yaratdığına görə tənqid edirlər.
Almaniyada hökumətin kənd təsərrüfatı sektorunda subsidiyaları ləğv etmək planlarına görə ötən ilin dekabrından etirazlar davam edir.
Polşa və Rumıniyada ucuz Ukrayna taxılının idxalına qadağa qoyulmasını tələb edirlər, Fransada isə əsasən yanacağın bahalaşmasından şikayətlənirlər.
Aİ-nin ən böyük kənd təsərrüfatı istehsalçısı olan Fransadakı fermerlər inflyasiya, artan kənd təsərrüfatı idxalı və tullantıların azaldılması və gübrələrin istifadəsini əhatə edən Aİ planlarına görə gəlirlərin azalmasına etiraz etmək üçün Paris və digər şəhərlərdə günlərlə traktorlarla yolları və magistral yolları bağlayırlar. Bir çox fermerlər AB Yaşıl Sövdələşməni işlək olmayan və bahalı hesab edirlər.
İtaliyada etiraz edən fermerlər Fransa və Almaniyadan olan həmkarlarına qoşularaq ölkənin müxtəlif ərazilərində kənd təsərrüfatı texnikası üzərində bir neçə qaçış həyata keçiriblər.
Fermerlər qanunvericilik səviyyəsində çoxlu sayda yeni məhdudlaşdırıcı tədbirlərin tətbiqini nəzərdə tutan Aİ-nin Yaşıl Sövdələşməyə qarşıdırlar və həmçinin bazarda qiymət təzyiqindən narahatdırlar.
İspaniyada kənd təsərrüfatı təşkilatları sektorun üzləşdiyi çətin vəziyyət fonunda fevral ayında nümayişlər elan ediblər.
İspan fermerləri məhsulun rentabelliyini azaldan və ərzaq qiymətlərini artıran Aİ-nin ekoloji qaydalarından narazıdırlar.
Oxşar problemlər Polşa, Belçika və Rumıniyada kənd təsərrüfatı sektorunun nümayəndələrini narahat edir.
Gununsesi.info
