2022-ci ildə ABŞ-nin müstəqilliyinin 246-cı ildönümü ilə bağlı Kitabıstanın təsisçisi Şəhriyar Məcidzadənin müəllifliyi ilə qısa sənədli film hazırlanıb.
Filmdə ABŞ-nin 28-ci prezidenti Vudro Vilsonun Azərbaycan Xalq Cümhuriyyəti ilə bağlı 1919-cu ildə səsləndirdiyi fikirlərdən bəhs olunur. Həmçinin Məhəmməd Əmin Rəsulzadənin ABŞ haqqındakı fikirlərindən yola çıxılaraq AXC və ABŞ-nin tarixi əlaqələrinə toxunulub.
Film haqqında Gununsesi.info-ya açıqlama verən filmin müəllifi Şəhriyar Məcidzadə bildirib ki, bu filmi ötən il sosial şəbəkədə paylaşmaq üçün hazırlayıblar: “Filmlə bağlı insanlardan olduqca müsbət reaksiyalar gəldi. Tədqiqata əsaslanan bu kimi filmlərin hazırlanması insanlarımızın dünyəvilik, konstitusion quruluş və bu kimi bəşəri dəyərlərin mahiyyətini daha yaxşı anlamasına yol açır.
Dünyanın müsbət təcrübələrini öyrənmək və xalqımıza təqdim etmək ənənəsi Azərbaycanın qurucu atalarından başlamış bir ənənədir. Tədqiqat üçün şəraitimiz və texniki imkanlarımız böyüsə, bu işi daha yüksək səviyyədə davam etdirmək istəyərik”.
Gununsesi.info
