“1996-cı ilin sonuna yaxın Azərbaycan prezidenti Heydər Əliyevin səyi nəticəsində Azərbaycan və Ermənistan Dağlıq Qarabağ probleminin həllinə çox yaxınlaşmışdılar. Ancaq Ermənistanın o zamankı baş naziri, Azərbaycanın işğal edilmiş zonalarında keçmiş səhra komandiri Robert Koçaryan, ordu rəhbərliyi bunun əleyhinə çıxdılar və Ermənistan prezidenti Levon Ter-Petrosyan istefaya getməli oldu”.
Gununsesi.info-nun məlumatına görə, bunu millət vəkili Aydın Mirzəzadə deyib. Onun sözlərinə görə, 1999-cu ildə Azərbaycan və Ermənistan yenidən problemin həllinə çox yaxınlaşdılar, ancaq həmin ilin oktyabr ayında bir qrup silahlı şəxs Ermənistan parlamentinə hücum etdi və 8 nəfəri, o cümlədən, həmin dövrdə ölkədə nüfuz sahibi olan baş nazir Vazgen Sarkisyanı və spiker Stepan Dəmirçyanı qətlə yetirdilər: “Bununla da ehtimal edilən həll qeyri-müəyyən dövrə saxlanıldı”. Millət vəkili deyib ki, bu ilin aprel ayında Ermənistan-Azərbaycan cəbhə xəttindəki hərbi əməliyyatlardan və Azərbaycanın hərbi uğurlarından sonra Ermənistan kompromislərə hazır olduğunu elan etdi, may və iyun aylarında Azərbaycan və Ermənistan prezidentlərinin görüşləri keçirildi, ATƏT-in Minsk qrupunun həmsədri olan Rusiya diplomatik fəallığı artdı.
“Son günlər prezidentlərin yeni görüşünün hazırlandığı və məsələnin həllində ümidlərin artdığı barədə də məlumatlar yayılır. Ancaq 17 iyul tarixində bir qrup silahlı şəxs Yervanın mərkəzində yol polisinin post-patrul xidmətinin binasını ələ keçirir. Təsadüfən orada Ermənistan polisinin rəis müavini olan general rütbəli şəxs də olur. Saxlanan girovlar tədricən azad edilir, ancaq bina yenə də silahlıların əlindədir. Çox müəmmalıdır ki, dövlət bir qrup silahlını oradan çıxara bilmir. Bu nədir, Ermənistan üçün adi bir kriminal hadisə, yoxsa, Ermənistan “dağlıqqarabağşünasları”nın Dağlıq Qarabağ probleminin həllinin qarşısını almaq üçün istifadə etdikləri köhnə üsul? Tamamilə, mümkündür. Ancaq Yerevanda unudurlar ki, Azərbaycan artıq ötən əsrin 90-cı illərinin Azərbaycanı deyil və işğal edilmiş torpaqlarının həmişəlik Ermənistanın nəzarətinin altında qalmasına dözmək fikirində deyil”- deyə, o, sözlərinə əlavə edib.
K. Həmzəoğlu
Gununsesi.info
