Azərbaycan prezidenti İlham Əliyevin sentyabrın 20-də Avropa İttifaqı-Azərbaycan Parlament Əməkdaşlıq Komitəsinin nümayəndə heyəti ilə görüşündə səsləndirdiyi ifadələr cəmiyyətdə ciddi rezonansa səbəb olub. Belə ki, əgər indiyədək rəsmi KİV orqanları ölkə başçısının Qərb və beynəlxalq təşkilatların nümayəndələri ilə görüşündə səslənən fikirlərin ancaq qısa xülasəsini təqdim edirdi. Ancaq sentyabrın 20-də avropalı parlamentarilərlə görüşdə dövlət başçısı Qərb ölkələrinin və onların strukturlarının Azərbaycan qarşı qərəzli mövqe nümayiş etdirməsi ilə bağlı səsləndiridiyi ifadələri olduğu kimi, cəmiyyətə çatdırdı. Bu fikirlərin niyə məhz indiki məqamda geniş ictimaiyyətə çatdırılmasının əsas məqsədi ilə bağlı millət vəkillərinə müraciət etdik.
Millət vəkili Fəzail İbrahimli Gununsesi.info-ya açıqlamasında bildirib ki, Azərbaycan 20 ildən artıqdır səbr nümayiş etdirir. “Təsəvvür edin ki, Azərbaycan 1991-ci ildə müstəqillyini əldə edib və bu zaman müddətində Ermənistan Azərbaycana qarşı işğalçılıq siyasəti həyata keçirir, bir milyondan artıq insan öz yurd-yuvasından didərgin düşüb. Ancaq bircə dəfə də olsun nə Qərb ölkələri, nə də beynəlxalq təşkilatların Azərbaycanla bağlı ədalətli mövqeyinin şahidi olmamışıq. Bu müddətdə Qərb və beynəlxalq təşkilatların dediyi kimi, hərəkət etmişik.
Ancaq bu ölkələr və təşkilatlar onalrım agentlərinə toxunarkən dərhal hay-küy qaldırır və dərhal “ürəkləri ağrıyır”. Və başlayırlar Azərbaycanı ittiham etməyə ki, insan haqları, demokratiya, söz azadlığı pozulur. Artıq nə qədər bu ikili siaysətə dözmək olar? Hər bir insanın səbr kasası var. Artıq Azərbaycanın səbr kasası dolub”- deyə, millət vəkili vurğulayıb.
Dövlət başçısının sərt və açıq formada səsləndirdiyi fikirlərə gəldikdə F.İbrahimli əlavə edib ki, Azərbaycan prezdenti zaman zaman belə açıq fikirlər səsləndirib: “Hələ bir neçə il bundan öncə dövlət başçılarının görüşündə Ermənistan prezidenti Türkiyə haqqında fikir səsləndirən zaman İlham Əliyev dərhal onun cavabını verərək, dedi ki, Türkiyə prezidenti burada deyil, mən buradayam. Mən cavab verə bilərəm. Belə bir cəsarətli bəyanat vermək hər dövlət başçısının işi deyil.Bundan əlavə olaraq iki il bundan öncə AŞPA-nın sessiyasında 47 ölkə nümayəndəsi qarşısında bəyanat xarakterli fikir səsləndirən Azərbaycan prezidneti İlham Əliyev bildirdi ki, bu gün Avropa ölkələri nümayəndəsi bilməsə də, erməni nümayəndə heyəti yaxşı bilir ki, Ermənistan dövləti məhz Azərbaycan torpaqları üzərində qurulub. Ermənistanın bugünkü paytaxtı olan İrəvan şəhəri Azərbaycan torpağıdır. Onun bu bəyanatı oradakıları şoka saldı. Odur ki, Azərbaycan prezidentinin avropalı parlamentarilərlə görüşündə səsləndirdiyi bu sərt və açıq ifadələr bundan öncəki cəsarətli ifadələrin məntiqi davamı idi”.
Millət vəkili onu da əlavə edib ki, bu gün Azərbaycanın nə hər hansı ölkə, nə də beynəlxalq təşkilat qarşısında cavabdehliyi yoxdur. “Qoy əvvəlcə onlar Azərbaycanın haqqını tanısınlar, sonra isə bizdən nəsə istəsinlər və ya tələb etsinlər. Bax, ölkə başçısının səsləndirdiyi ifadələrin əsas fəlsəfəsi bundan ibarət idi”- deyə, millət vəkili bildirib.
Mürtəza
Gununsesi.info
