Bakıda dünən gecədən yağan qar az olsa da nəqliyyatın hərəkətində bir sıra çətinliklər yaradıb. Paytaxtın bəzi yerlərində isə kommunal xidmətlərin problemləri də üzə çıxıb.
Tanınmış ekspert Rövşən Ağayev Gununsesi.info-ya açıqlamasında bu vəziyyətə görə yerliidarəetmə orqanlarının fəaliyyətinə diqqət çəkib.
“İnkişaf etmiş ölkələrdə, hətta bizdən çox uzaqda olmayan Türkiyədə yerli seçkilərin taleyini həm də fövqəladə vəziyyətlərdə, o cümlədən pis hava şəraitlərində nəqliyyat axınının, kommunal xidmətlərin verilməsinin fasiləsizliyinin təmin edilməsində bələdiyyələrin nə dərəcədə effektiv tədbirlər görə bilməsi həll edir. Seçici həmişə seçki arası dövrlərdə cibində futbol hakimləri kimi 3 rəngdə kart gəzdirir: seçkili şəxslər aralıq dövrdə nə qədər çox sarı karta alırlarsa, seçki günü avtomatik qırmızı kart çıxır…
Təəssüf ki, müstəqillik əldə etdiyimiz 32 ildə biz seçib-seçilməyin həzzini və toplumun rifah içərisində yaşamaq üçün verdiyi töfhələrin dadını yaşaya blməmişik. Müstəqillik dövrünün ən aktiv nəsli hesab oluna biləcək 70 və 80-cilər bu problemin öhdəsindən gələ bilmədi və 50 və 60-cıların əzici zərbələri altında ancaq məğlubiyyət yaşadı”.
Azərbaycanda Bələdiyyələrin lazımsız qurum vəziyyətində olduğunu vurğulayan ekspert deyir ki, onların statusu və normal büdcə olmadığından bu cür situasiyalarda nəsə edə bilmir.
Gununsesi.info
