Oktyabrın 21-dən 27-dək Bakı Expo Mərkəzdə müxtəlif nəşriyyatların və müəlliflərin iştirak etdiyi sərgi keçirilir.
Sərginin ikinci günündə iştirakçılar ziyarətçi fəallığını və ümumi mənzərəni dəyərləndiriblər.
Müəlliflərin fikrincə, hələlik gözlənilən canlanma hiss olunmur və əsas ümidlər həftə sonuna yönəlib.
Gununsesi.info-ya danışan yazıçı Vüqar Van sərginin gedişatını şərh edərkən bildirib ki, ikinci gün olduğundan ümumi vəziyyətlə bağlı qəti fikir söyləmək hələ tezdir. Bununla belə, indiki mərhələdə müəyyən zəiflik müşahidə olunur.
Onun fikrincə, qarşıdakı günlərdə ziyarətçi sayının artıb-artmayacağı sərginin ümumi mənzərəsini daha aydın göstərəcək.
Yazıçı Şəhriyar Del Gerani də sərgidə fəallığın hələlik gözlənilən səviyyədə olmadığını qeyd edib.
Onun sözlərinə görə, iştirakçılar həftə sonu daha çox ziyarətçi olacağına ümid edirlər. Bununla belə, indiki mənzərə o qədər də ürəkaçan deyil və qarşıdakı günlərdə vəziyyətin dəyişməsi gözlənilir.
Yazıçı İlham Əziz isə sərginin ilk günü olduğuna görə yekun qiymətləndirmə aparmağın tez olduğunu vurğulayıb.
O bildirib ki, buna baxmayaraq, hazırkı vəziyyətə nəzər saldıqda müəyyən zəiflik hiss olunur. Müəllif sərginin növbəti günlərdə daha fəal keçəcəyinə və ziyarətçi marağının artacağına ümid etdiyini ifadə edib.
Beləliklə, sərginin ilk günlərində iştirakçılar arasında əsas gözlənti həftə sonu ziyarətçi fəallığının artmasıdır. Oktyabrın 27-dək davam edəcək sərgidə qarşıdakı günlərin ümumi mənzərəyə necə təsir edəcəyi maraq doğurur.
Elmar
