Yanvarın 6-da Bakı-Sumqayıt-Bakı elektrik qatarının xidmətlərindən istifadə edən 1000.000-cu (bir milyonuncu) sərnişinin adı bəlli olub.
“Azərbaycan Dəmir Yolları” Qapalı Səhmdar Cəmiyyətinin İctimaiyyətlə əlaqələr şöbəsinin rəhbəri Sevinc Qədirova Gununsesi.info-ya açıqlamasında bildirib ki, sertifikatın sahibi əslən Şəmkir rayonundan olan Bakı Dövlət Universitetinin “Kitabxanaşünaslıq-informasiya” fakültəsinin tələbəsi Leyla İsrayıl qızı Hüseynzadə olub.
Təqdimat mərasimində iştirak edən “Azərbaycan Dəmir Yolları” QSC-nin Sərnişin Daşımaları Departamentinin rəis müavini Mədəd Şıxəmirov kütləvi informasiya vasitələri nümayəndələrinə məlumat verərək bildirib ki, Bakı-Sumqayıt-Bakı marşrutu ilə ikimərtəbəli elektrik qatarları 12 sentyabr 2015-ci ildən hərəkətə başlayıb. “Stadler Rail Group” şirkətinin istehsalı olan yüksək komfortlu KİSS markalı ikimərtəbəli elektrik qatarlarından istifadə edən sərnişinlərin sayı getdikcə artmaqdadı. Qeyd edək ki, Bakı-Sumqayıt-Bakı elektrik qatarı ilə gün ərzində daşınan sərnişinlərin sayı 5000-ni keçib. Bu gün isə bir milyonuncu sərnişini yola salırıq.
İctimaiyyətlə əlaqələr şöbəsinin rəisi Sevinc Qədirova Bakı Dövlət Universitetinin tələbəsi Leyla Hüseynzadəni 1000.000-cu (bir milyonuncu) sərnişin olması münasibətilə “Azərbaycan Dəmir Yolları” Qapalı Səhmdar Cəmiyyətinin rəhbərliyi adından təbrik edib, ona biznes-klass vaqonunda 2 (iki) ay ərzində pulsuz gediş sertifikatı, planşet və gül dəstəsi təqdim edib.
Sonra bir milyonuncu sərnişin KİV nümayəndələrinin və dəmir yolu nümayəndələrinin müşayiəti ilə biznes-klass vaqonunda yerini tutub.
“Azərbaycan Dəmir Yolları” Qapalı Səhmdar Cəmiyyəti olaraq bildiririk ki, gələcəkdə də sərnişinlərin tam komfortlu və təhlükəsiz şəraitdə mənzil başına çatdırılması istiqamətində görülən işlər davam etdiriləcək.
Gununsesi.info
