Bakıda 1 nəfərin ölümü ilə nəticələnən yol qəzası baş verib.
Gununsesi.info-nun Fövqəladə Hallar Nazirliyinin (FHN) saytına istinadən verdiyi xəbərə görə, paytaxtın Yasamal rayonunda “VAZ” markalı minik avtomobil “Shacman” markalı yük maşını ilə toqquşub. Dərhal nazirliyin Xüsusi Riskli Xilasetmə Xidmətinin xilasediciləri hadisə yerinə cəlb olunaraq “VAZ” markalı minik avtomobilində sıxılmış vəziyyətdə qalmış 1987-ci il təvəllüdlü Fərid Cavanşir oğlu Seyidovun cəsədini çıxarıb və aidiyyəti üzrə təhvil veriblər.
***
Bakının Nərimanov rayonunda da, H.Əliyev və K.Rəhimov küçələrinin kəsişməsində yol qəzası baş verib.
Məlumata görə, avtoqəza zamanı “Toyota” və “Hyundai” markalı minik maşınları toqquşub. Əraziyə YPX müfəttişləri cəlb olunub və ilkin məlumatda bildirilib ki, hadisə avtomobillərin sürücülərinin bir-birinə yol verməməsi səbəbindən baş verib.
Belə ki, “Toyota” markalı avtomobil K.Rəhimov, “Hyundai” markalı avtomobil isə H.Əliyev küçəsi ilə hərəkətdə olub və anlaşılmazlıq nəticəsində yol ayrıcında minik maşınları toqquşub.
Xəsarətsiz ötüşən avtoqəzanın səbəbləri araşdırılır.
Gununsesi.info
