Bu gün Bakı Dövlət Universitetində (BDU) müxtəlif illərdə bu ali təhsil ocağının bitirmiş vyetnamlı məzunlarla görüş keçirilib.
BDU-nun Mətbuat və informasiya şöbəsindən Gununsesi.info-ya verilən məlumata görə, universitetin hüquq, geologiya, fizika, mexanika və tətbiqi riyaziyyat, şərqşünaslıq, kimya, biologiya fakültələrinin məzunları ilə görüşü rektor, akademik Abel Məhərrəmov açıb. Bu günün BDU-nun həyatında əlamətdar tarixlərdən biri olduğunu bildirən rektor vyetnamlı məzunların təhsil aldığı dövrdən uzun müddət keçsə də yenidən universiteti ziyarət etmələrindən məmnunluğunu ifadə edib.
Rektor qeyd edib ki, BDU-nun vyetnamlı məzunları ölkələrində tanınmış şəxslərdir. Onların arasında nazir, nazir müavinləri postunda, eyni zamanda, dövlət və hökumət strukturlarında, ali təhsil sistemində çalışan çoxsaylı mütəxəssislər var.
Azərbaycan-Vyetnam əlaqələrindən danışan rektor bugünkü görüşün xalqlarımız arasında olan tarixi dostluğun bariz nümunəsi olduğunu bildirib.
Vyetnamın Hanoi Universitetinin professoru, BDU-nun Biologiya fakültəsinin 1978-ci il məzunu Nquyen Van Ma yenidən universitetdə olmaqdan və onlara dərs demiş müəllimlərini görməkdən məmnun olduqlarını bildirib.
Görüşdə universitetin vyetnamlı məzunlara dərs demiş müəllimləri keçmiş tələbələri ilə bağlı xatirələrini bölüşüblər.
Gununsesi.info
