İnsan istirahətə gedəndə ölüm haqqında düşünmür.
Dağın başına qalxanda, şəhərin səsindən uzaqlaşanda, təbiətin qoynunda bir neçə saat keçirmək istəyəndə heç kim ağlına gətirmir ki, geri qayıtmayacaq.
Amma sentyabrın 8-də Şəkinin Baş Kəldək kəndi ərazisində yerləşən “Şəki Yaylası” istirahət mərkəzində məhz belə oldu. Kanatın trosu qırıldı. İki insan yüksəklikdən yerə düşdü. Coşqun Məmmədov və Ucal Bayramov həyatını itirdi.
Bəzən faciələr bir neçə saniyənin içində baş verir. Amma həmin bir neçə saniyənin arxasında illərlə davam edən suallar dayanır.
O tros nə vəziyyətdə idi?
Qurğu sonuncu dəfə nə vaxt texniki baxışdan keçirilmişdi?
Təhlükəsizlik sistemi necə yoxlanılırdı?
Bu qurğudan istifadə edən insanların həyatına cavabdeh olan mexanizm həqiqətən işləyirdimi?
Bunlar sadəcə texniki suallar deyil.
Çünki söhbət iki insanın həyatından gedir.
İstirahət mərkəzinə daxil olan insan orada bir xidmət alır. Və həmin xidmətin ən fundamental şərti təhlükəsizlik olmalıdır. İnsan pulunu mənzərəyə, əyləncəyə, adrenalində olan bir neçə dəqiqəyə görə ödəyə bilər. Amma heç kim həyatını riskə atmaq üçün pul ödəmir.
İnsan kanata minəndə trosun metallurgiyasını düşünməməlidir.
O, “görəsən, bu qurğu yoxlanılıb?” sualını özünə verməməlidir.
Çünki bunun cavabdehi sərnişin deyil.
İki ölüm artıq baş verib.
İndi heç bir izahat Coşqunu geri qaytarmayacaq. Heç bir araşdırmanın nəticəsi Ucalın ailəsinin yaşadığı boşluğu doldurmayacaq.
Amma araşdırma yenə də lazımdır.
Çünki bu faciənin ən böyük mənası yalnız günahkarı tapmaq deyil. Əsas məsələ odur ki, bu iki ölüm sonuncu olmasın.
Əgər bir qurğunun təhlükəsizliyi vaxtında yoxlanılmayıbsa, bunu bilmək lazımdır.
Əgər səhlənkarlıq olubsa, bunun məsuliyyəti müəyyən edilməlidir.
Əgər nəzarət mexanizmində boşluq varsa, həmin boşluq bağlanmalıdır.
Çünki iki insanın ölümü “bədbəxt hadisə” sözünün içində itib getməməlidir.
Bəzən “bədbəxt hadisə” dediyimiz şeyin içində əslində vaxtında görülməyən bir tədbir, cavabsız qalan bir sual, imzalanmış, amma yoxlanılmamış bir sənəd, gözardı edilmiş bir nasazlıq gizlənə bilər.
Elmar
Gununsesi.info
