İsrailin baş naziri Benyamin Netanyahu Yaxın Şərq turu çərçivəsində Təl-Əvivə səfər edən ABŞ dövlət katibi Antoni Blinkenlə görüşüb.
Gununsesi.info-nun məlumatına görə, İsrailin Kanal 12 televiziyasının xəbərində görüşdən sonra İsrail Nazirlər Kabineti tərəfindən edilməsi gözlənilən yazılı açıqlamanın dərc edilmədiyi və bu vəziyyətin iki tərəf arasında fikir ayrılığına işarə etdiyi bildirilib.
Xəbərdə ABŞ və İsrail arasında “müharibə mövzusunda fikir ayrılığının dərinləşdiyi” vurğulanaraq, “Vaşinqtonun səbrinin tükəndiyi” ifadə edilib.
Xəbərdə Netanyahunun ABŞ dövlət katibi Blinkenin mətbuat konfransında iştirak etməyəcəyi iddia edilib.
Daha sonra ABŞ-ın Qərbi Qüdsdəki Qüds səfirliyində mətbuat konfransı keçirən Blinken İsrailə gələrək bölgə ölkələri ilə keçirdiyi görüşlərdən sonra açıqlamalar verib.
İsrailin baş naziri Netanyahu ilə görüşünə də toxunan Blinken, “Bugünkü görüşlərdə Fələstinli mülki vətəndaşların şərtlərin imkan verdiyi zaman evlərinə dönə bilməsi lazım olduğunu çox açıq şəkildə ifadə etdim. (Fələstinlilərə) Qəzzanı tərk etmələri üçün təzyiq edilməməlidir” deyib.
Blinken deyib ki, missiya “köçkün fələstinlilərin şimaldakı evlərinə qayıtması üçün nə edilməli olduğunu müəyyən edəcək”.
“Bu, bir gecədə baş verməyəcək. Ciddi infrastruktur və humanitar problemlər var. Lakin missiya bu maneələri və onların necə aradan qaldırılacağını qiymətləndirmək üçün prosesə başlayacaq”, – o bildirib.
Blinken həyat yoldaşını, oğlunu və qızını itirən Əl-Cəzirə müxbiri Vail ed-Dahduh, həmçinin operator dostu Samir Əbu Dakka və nəhayət, jurnalist olan oğlu Həmzə ed-Dahduh üçün başsağlığı verib.
Blinken ABŞ-ın fələstinlilərin Qəzzadan köçürülməsini müdafiə edən hər hansı təklifi rədd etdiyinə diqqət çəkib. “Fələstinlilərin siyasi hüquqları baxımından irəliyə doğru bir yolun olması da həyati əhəmiyyət kəsb edir. Biz və region ölkələri Qəzza və İordan çayının qərb sahili də daxil olmaqla Fələstin administrasiyasını dəstəkləyirik. Bu, bölgədə danışdığım hər kəsə bir daha aydın oldu”, – deyə o bildirib.
ABŞ dövlət katibi Blinken Türkiyə və Yunanıstandan sonra bölgə turu çərçivəsində Səudiyyə Ərəbistanına, ardınca İordaniya, Qətər və Birləşmiş Ərəb Əmirliklərinə (BƏƏ) gedib. Dünən İsrailə gələn Blinken İsrail prezidenti İsaak Hersoq, baş nazir Netanyahu, xarici işlər naziri İsrael Katz və döyüş kabinetinin üzvləri ilə görüşüb.
Blinkenin sabah davam edəcək səfəri çərçivəsində İsrailin müdafiə naziri Yoav Qallant, Müharibə kabinetinin üzvü Benni Qantz və ana müxalifət lideri Yair Lapidlə görüşləri gözlənilir.
Qəzza müharibəsinin başladığı 7 oktyabrdan bu yana 5-ci Yaxın Şərq turuna çıxan Blinkenin Tel-Əvivdən sonra İordan çayının qərb sahilində Fələstin rəsmiləri ilə görüşdükdən sonra Misirə getməsi gözlənilir.
Gununsesi.info
