Birləşmiş Millətlər Təşkilatının Baş Assambleyası (BMT Baş Assambleyası) gələn həftə İsrailin “işğal edilmiş Fələstin ərazilərində qeyri-qanuni varlığına” son qoymaq üçün təklif olunan Fələstin qanun layihəsini səsə qoyacaq.
Gununsesi.info xarici mediaya istinadən xəbər verir ki, bu qərar layihəsi İsrailin 6 ay ərzində Fələstin torpaqlarından çıxmasını nəzərdə tutur.
Bildirilir ki, Baş Assambleyada qəbul edilən qərarlar məcburi deyil, lakin onların siyasi çəkisi var.
Fələstin Administrasiyasının yazdığı qərar layihəsinin əsas məqsədi Beynəlxalq Ədalət Məhkəməsinin İsrailin Fələstin torpaqlarını, yaşayış məntəqələrini işğal etməsinin qeyri-qanuni olduğunu və geri çəkilməli olduğunu bildirən məsləhətçi rəyini qarşılamaqdır.
Səsvermə dünya liderlərinin Birləşmiş Millətlər Təşkilatında illik toplantısı üçün Nyu-Yorka gəlməsindən bir neçə gün əvvəl keçiriləcək.
İsrailin BMT-dəki nümayəndəsi Denni Danon BMT Baş Assambleyasından bu biabırçı qətnaməni tamamilə rədd etməyi və bunun əvəzinə HƏMAS-ı pisləyən və bütün girovların dərhal azad edilməsini tələb edən qətnamə qəbul etməyi xahiş edib: “Beynəlxalq Ədalət Məhkəməsinin məsləhət rəyi məcburi deyil, lakin bu, beynəlxalq hüquq çərçivəsində ağırlıq daşıyır və İsrailə dəstəyi sarsıda bilər. Baş Assambleyanın qərarı da məcburi deyil, lakin onun siyasi çəkisi var”.
Şəbnəm
Gununsesi.info
