Birləşmiş Millətlər Təşkilatının Təhlükəsizlik Şurasında (BMT TŞ) Qəzzaya humanitar yardımın maneəsiz daxil olması üçün münaqişənin dayandırılmasını tələb edən qətnamə layihəsinin səsverməsi razılaşma əldə olunmadığı üçün ikinci dəfə təxirə salınıb.
Gununsesi.info xəbər verir ki, Nyu-Yorkun yerli vaxtı ilə saat 17:00-da keçirilməsi planlaşdırılan səsvermə ləğv edilib.
İkinci dəfə təxirə salınan səsvermənin dekabrın 20-də keçirilməsinin planlaşdırıldığı öyrənilib.
Mənbələr Birləşmiş Ərəb Əmirliklərinin hazırladığı Qəzza qətnamə layihəsinə ABŞ-ın hələ də inanmadığını və dəstək verən ölkələrin mövzu ilə bağlı təqdim edilən qanun layihəsinə bir daha veto qoyulmaması üçün danışıqları davam etdirmək qərarına gəldiyini bildirib.
ABŞ Daimi Nümayəndəsinin müavini Robert Vud jurnalistlərə verdiyi açıqlamada bildirib ki, qətnamə layihəsi üzərində hələ də digər aktyorlarla işləyirlər. “Hazırda harada olduğumuzu deyə bilmərəm, bu gün keçiriləcək danışıqlara nəzər salacağıq”.
Qətnamə layihəsi humanitar yardıma fasiləsiz və təhlükəsiz çıxışı təmin etmək üçün Qəzzada hərbi əməliyyatların dərhal dayandırılmasını tələb edir.
Qətnamə layihəsində bütün tərəflər beynəlxalq hüquqa və beynəlxalq humanitar hüquqa uyğun olaraq mülki şəxslərin müdafiəsi üzrə öhdəliklərini yerinə yetirməyə çağırılır və BMT baş katibindən yardıma nəzarət mexanizminin yaradılması xahiş olunur.
BMT-nin yardımın humanitar yardım olduğunu təsdiqləməsini və yardım növləri ilə bağlı “Fələstin Administrasiyası və İsrail”ə məlumat verməsini tələb edən qətnamə layihəsində yardımın paylanması üçün lazımi yanacağın təmin edilməsi çağırışı yer alır.
Qətnamə layihəsində bütün girovların azad edilməsi tələb olunur və beynəlxalq humanitar hüququn istənilən pozulması pislənir.
BMT-nin baş katibi Antonio Quterreş səlahiyyət müddəti ərzində ilk dəfə olaraq səlahiyyətlərindən istifadə edərək, Qəzzada humanitar fəlakətin qarşısını almaq üçün BMT Nizamnaməsinin 99-cu maddəsinə istinad edib və dekabrın 6-da BMT Təhlükəsizlik Şurasına məktub göndərib.
Quterreş “Təhlükəsizlik Şurası üzvlərini humanitar fəlakətin qarşısının alınması üçün təzyiq göstərməyə çağırıb və humanitar atəşkəsin elan edilməsi tələbini təkrarlayıb”.
Bunun ardınca dekabrın 8-də BMT Təhlükəsizlik Şurasında keçirilən səsvermədə Qəzzada təcili humanitar atəşkəs tələb edən qətnamə layihəsinə ABŞ tərəfindən veto qoyulub.
ABŞ daha əvvəl 16, 18 və 25 oktyabrda BMT Təhlükəsizlik Şurasında Qəzzə ilə bağlı təqdim edilmiş qətnamə layihələrinə veto qoymuşdu.
Oktyabrın 7-dən sonra BMT Təhlükəsizlik Şurasının bir çox iclasları keçirilib və bir çox qətnamə layihəsinə veto qoyulduqdan sonra, Qəzzadakı münaqişələrdə “dərhal və uzadılmış fasilə” tələb edən 2712 saylı qətnamə noyabrın 15-də qəbul edilib.
Gununsesi.info
