“Dostluq” kinoteatrının sökülməsiylə bağlı mətbuatda və sosial şəbəkələrdə bir neçə gündür ki, xəbərlər dolaşır.
Gununsesi.info-nun xəbərinə görə, binanın söküləcəyi təqdirdə “Dostluq” kinoteatrının binasında fəaliyyət göstərən Xalq artisti Amaliya Pənahovanın rəhbərlik etdiyi Bələdiyyə Teatrı və 119 saylı Ağdam rayon Seçki Dairəsinin 36 saylı Seçki Məntəqəsi də oradan çıxarılacaq. Bələdiyyə Teatrının rəhbəri Xalq artisti Amaliya Pənahova əməkdaşımızla söhbətində məsələyə münasibət bildirməkdən imtina edib: “Bu haqda danışmaq istəmirəm”-, deyə o bildirib.
Qeyd edək ki, Xalq artisti Amaliya Pənahovanın rəhbərlik etdiyi Bələdiyyə Teatrı rəsmən “Dostluq” kinoteatrında yerləşsə də, əslində, teatrın əməkdaşları tamaşalara başqa müəssisələrdə məşqlər aparırılar. Eləcə də, tamaşalar üçün müxtəlif teatrların səhnələrini müvəqqəti arendaya götürürlər. Xalq artisti Amaliya Pənahova isə World Business Centredəki ofisində fəaliyyət göstərir.
Xatırladaq ki, Nəsimi rayonu ərazisində yerləşən və sovet dönəmindən indiyədək fəaliyyət göstərən “Dostluq” kinoteatrının binası sökülür.
Gununsesi.info-nun xəbərinə görə, “Dostluq” kinoteatrının binasını sökülüb, yerində hündürmərtəbəli yaşayış evləri tikiləcək. Bununla əlaqədar olaraq, “Dostluq” kinoteatrının binasında fəaliyyət göstərən qurumlara da köçürülməylə bağlı xəbərdarlıq edilib ki, tezliklə ərazini boşaltsınlar.
Gülnaz Qənbərli
Gununsesi.info
