Çinin Suçjou şəhərində magistral yolun buz bağlayan hissəsində 100-dən çox avtomobilin bir-birinə çırpılması nəticəsində bir neçə nəfər xəsarət alıb.
Gununsesi.info xəbər verir ki, Suçjou yol polisinin “WeChat” sosial media hesabında yaydığı məlumata görə, 3 nəfər yaralanaraq xəstəxanaya çatdırılıb, 6 nəfər isə yüngül xəsarət alıb. Polis yolda hərəkətin bərpa edildiyini və qəzanın səbəblərinin araşdırıldığını bildirib.
Soyuq dalğalar, qar fırtınası və buzlu yağış son bir neçə həftə ərzində Çinin çox hissəsini vurub və milyonlarla insan Ay Yeni ilini qeyd etmək üçün evlərinə tələsərkən nəqliyyatın hərəkətinə təsir edib.
Sinxua agentliyi xəbər verir ki, bu həftə ərzində hökumət dondurucu temperaturlara təcili reaksiyasını gücləndirib və Pekin, Hebey, Şanxi, Anhui və Hubey kimi əyalət və şəhərlərdə nəqliyyat axını, təchizatı və elektrik enerjisi üçün müxtəlif planlar işə salıb.
Çin Meteorologiya İdarəsi bəzi mərkəzi və cənub bölgələrində donma və aşağı temperaturla bağlı yüksək xəbərdarlıq edib.
Gununsesi.info
