Ukryanada Rusiya təcavüzünə qarşı döyüşmək üçün çeçenlərdən ibarət batalyon təşkil edilir.
Çeçen könüllülərdən ibarət Şeyx Mənsur və Covxar Dudayev adına batalyonlar Ukrayna ordusunun tərəfində döyüşdüklərini bəyan ediblər.
Bəzi xəbərlərə görə Çeçenistanın moskvayönlü başçısı Ramzan Kadırov soydaşlarını silahı yerə qoymağa çağırıb və sözü gedən batalyonların komandirlərinin başı üçün 500 min dollar mükafat elan edib.
Lakin AzadlıqRadiosuna müsahibəsində Şeyx Mənsur batalyonunun komandiri Muslim Çeberloyevski deyib ki, Kadırovu ciddi qəbul etmir və onun əsas düşməni Vladimir Putindir:
“Onun belə nağıllarını çox eşitmişik. O uşaqları bura göndərir, özü isə kiminsə başı üçün qəpik-quruş mükafat qoyur. O həmişə deyib ki, Putinin piyadasıdır, Putinin quludur, Putinin əsgəridir və Putin üçün dünyanın istənilən nöqtəsinə getməyə hazırdır. Odur ki, qoy üstümüzə uşaq-muşağı göndərməsin, yaxınlarını dəstəyə yığıb özü gəlsin.
Bizim o vaxtdan bəri Rusiya ilə problemimiz var…”
Muslim Çeberloyevski deyib ki, onun batalyonuna könüllülər gəlməkdə davam edir. O bildirib ki, hazırda yeni qruplar yaradılır və çeçenlər “Putinlə, Kadırovla, Hitlerlə, Lukaşenka” ilə üzbəüz görüşə hazırdırlar:
“Bizə bu müharibə lazım deyil. Bu müharibəni bizə qarşı başlayıblar. İçkeriya çeçen respublikası da başqa respublikalar kimi Sovet İttifaqı dağılarkən ondan ayrılmış, müstəqillik və suverenliyini elan etmişdi. Bizim o vaxtdan bəri Rusiya ilə problemimiz var…Biz birinci müharibəni udmuşduq. Amma 1999-cu ildə onlar səhvlərini düzəltdilər, çatışmazlıqları aradan qaldırdılar…”
“Biz ən müxtəlif səbəblərlə Çeçenistanı tərk etməli olduq. Bizim dörd prezidentimiz həlak olub. Sağ qalan bütün komandanlıq xaricə köçüb”.
Çeçen komandir bildirib ki, uzun illər onların üzərində olan məhdudiyyətlər qaldırılıb və onlar Ukraynanı və Kiyevi müdafiə etməyə tam hazırdırlar. “Əsəs düşməniniz kimdir” sualına Muslim Çeberloyevski belə cavab verib:
“Bu saat Yer üzündə mənim əsas düşmənim Putin, onun rejimi və ətrafındakılardır. Kadırov kimdir axı? Siz jurnalistlər onun əhəmiyyətini şişirtmsiniz. Guya o müstəqil şəxsdir. Kadırov Putinin nökəri və şestyorkasıdır. Əlbətə deyəndə ki, çeçenlər Ukraynaya hücum ediblər, bizim xətrimizə dəyir. Bu özünü çeçen adlandıran alçaqların çeçenlərlə heç bir əlaqəsi yoxdur. Bizim Ukrayna ilə heç vaxt düşmənçiliyimiz olmayıb və olmayacaq. Çeçenistan Rusiya ilə iki müharibədə 1 milyonluq əhalisinin 300 minini itirib. Baxın, əsl çeçenlər belə olur. Amma bu əclaflar Putinin nökərləridir”.
Çeçen komandir daha sonra vətənindəki vəziyyətdən danışıb:
“Əgər Kadırov özünü çeçen sayırsa niyə onu Luqanksdan da balaca olan Çeçenistanda 100 min silahlı Rusiya əsgəri mühafizə edir? O onlarsız heç kimdir. Onu hazırda Çeçenistan ərazisində girova çevirdiyi adi insanlar imkanları olsaydı məhv edərdilər. Amma Kadırovu 100 minlik Rusiya ordusu qoruyur”.
