Böyük Britaniyanın keçmiş baş naziri Boris Conson hakim Mühafizəkarlar Partiyasında liderlik yarışında iştirak etməyəcəyini açıqlayıb.
Boris Conson bazar günü axşam yarışa girmək üçün kifayət qədər dəstəyə malik olduğunu, lakin namizədliyinin düzgün olmadığı qənaətinə gəlib.
Gununsesi.info Britaniya mediasına istinadən bildirir ki, hazırda 100-dən çox deputatın dəstəyini qazana bilən Rişi Sunakdan başqa heç bir namizəd yoxdur.
“Bu gün günortaya qədər başqa namizəd çıxmasa, Sunak baş nazir olacaq” deyə BBC yazır.
Conson Mühafizəkarlar Partiyasının 357 millət vəkilindən 102-nin dəstəyini qazandığını iddia edib.
Bununla belə, bu günə qədər Consonu açıq şəkildə dəstəklədiyini bildirən qanunvericilərin sayı 57-dir. Bütün bu hadisələr Rişi Sunakın yarışının favoriti olduğunu göstərir.
Gununsesi.info Rişi Şunakın həyatı haqqında bəzi bilgiləri təqdim edir:
12 may 1980-ci ildə Britaniyada anadan olan Rişi Sunak 2020-ci ildən 2022-ci ilə qədər Maliyyə Nazirliyinin kansleri vəzifəsində çalışıb.
Mühafizəkarlar Partiyasının üzvüdür, 2015-ci ildən bəri Richmond (Yorks) parlamentinin üzvüdür.
1960-cı illərdə Şərqi Afrikadan Britaniyaya köçmüş hind əsilli valideynlərinin ailəsində Sauthemptonda anadan olub. Vinçester Kollecində təhsil alıb. Daha sonra o, Oksforddakı Linkoln Kollecində fəlsəfə, siyasət və iqtisadiyyat (PPE) oxuyub və daha sonra Fulbrayt təqaüdçüsü kimi Kaliforniyadakı Stanford Universitetində MBA dərəcəsi qazanıb. Stanfordda oxuyarkən o, Infosys şirkətini quran hindli milyarder iş adamı N. R. Narayana Murtinin qızı, gələcək həyat yoldaşı Akşata Murti ilə tanış olur. Sunak və Murti 2022-ci ilə qədər 730 milyon funt-sterlinq ümumi sərvətlə Britaniyanın 222-ci ən zəngin insanlarıdır.
Gunay Təhməzova
Gununsesi.info
