Qonaq evində baş verən yanğın nəticəsində insanların həlak olduğu Rumıniyanın Prahova qraflığının hakimiyyət orqanları bütün bu binaların qanuniliyi və təhlükəsizlik meyarlarına uyğunluğu üçün gücləndirilmiş yoxlamalar elan edib.
Gununsesi.info xəbər verir ki, bu barədə “Digi24” məlumat yayıb.
Araşdırma zamanı məlum olub ki, yanan ev lazımi icazələr olmadan tikilib və ilkin olaraq istifadə edilib.
O da məlum olub ki, mülkiyyətçi 2019-20-ci illərdə aparılan yoxlamalardan sonra yanğın təhlükəsizliyi qaydalarına əməl etmədiyinə görə dəfələrlə xəbərdarlıq alıb.
“Sabah mən qonaq evlərində texniki pasportlar, fəaliyyət icazələri və təbii ki, yanğın təhlükəsizliyinə uyğunluq olub-olmadığını yoxlamaq əmri verəcəyəm”, – deyə əyalətin prefekti Virgiliu Nanu bildirib.
Xatırladaq ki, yanğın dekabrın 26-da səhər saatlarında baş verib, həmin vaxt evdə 26 nəfər olub. 18 qonaq vaxtında binadan çıxa bilib, onlardan bir uşaq və bir böyük yüngül yanıq xəsarətləri alıb.
Xilasedicilər indiyədək biri uşaq olmaqla 6 nəfərin öldüyünü təsdiqləyib. Daha iki nəfər itkin düşmüş hesab olunur.
Dekabrın ortalarında ölkədə daha bir faciəli hadisə baş verib – 17 yaşlı yeniyetmə məktəb binasının uçması nəticəsində ölüb, daha üç uşaq dağıntılar altından xilas edilib.
Gununsesi.info
