Son illərdə qəbul olunan qərarların içində ən absurdu dərslərin iyun ayının 15-dək uzaldılmasıdır. İkinci yerdə gələn absurd qərar isə dərslərin sentyabr ayının 15-də başlamasıdır. Gununsesi.info xəbər verir ki, bunu Milli Məclisin İnsan hüquqları, eləcə də İctimai birliklər və dini qurumlar komitəsinin üzvü Fazil Mustafa bildirib. Deputatın fikrincə, orta məktəblərdə dərslər sentyabrın 1-də başlamalı, mayın 31-də isə bitməlidir: “Uşaq bağçaları, orta məktəb və ali məktəblər üçün bu cür vaxt dəyişiminin hansısa faydası olduğunu düşünmürəm. Dərslər sentyabrın 1-də başlayar və mayın 31-də tamamlanarsa, həm təhsil alanlar və müəllimlər rahat olar, həm də valideynlər vaxt uzatmanın girovuna çevrilməzlər”
