Deputatlar Vəkillər Kollegiyasında

  • By admin
  • 25 Yanvar 2018 17:28

Bu gün Milli Məclisin Hüquq siyasəti və dövlət quruculuğu komitəsinin sədri Əli Hüseynli, komitə üzvləri Çingiz Qənizadə, Qüdrət Həsənquliyev Vəkillər Kollegiyasının Rəyasət Heyətinin binasında Rəyasət Heyətinin rəhbərliyi ilə görüş keçiriblər. 

Vəkillər Kollegiyasından Gununsesi.info-ya verilən məlumata görə, fikir mübadiləsi şəraitində keçən görüşdə Vəkillər Kollegiyasının sədri Anar Bağırov son aylar ərzində görülmüş işlər, xüsusilə vəkilliyə qəbul imtahanlarına hazırlığın vəziyyəti, vəkilliyə namizədlərin tərkibinə dair statistika barədə məlumat verib, habelə vəkillik fəaliyyətinin təkmilləşdirilməsi, vətəndaşların hüquqlarının daha səmərəli müdafiəsi üzrə gələcəkdə vəkillik haqqında qanunvericiliyin təkmilləşdirilməsinə dair bir sıra təkliflər irəli sürüb.

Görüş ərzində deputatlar ölkəmizdə ödənişsiz hüquqi yardımın vəziyyəti, Vəkillər Kollegiyasının fəaliyyətinin daha da səmərələşdirilməsi və onun maddi-texniki təminatının yaxşılaşdırılması, Kollegiyanın gələcək planları, qarşıdan duran problemlər barədə maraqlanıb və onların həlli istiqamətində təkliflər veriblər.

Əli Hüseynli növbəti dövrdə Vəkillər Kollegiyasının fəaliyyətinin daim diqqətdə saxlanılmasının mühüm olduğunu vurğulayaraq, gələcəkdə Komitə ilə Kollegiya arasında təmasların daha intensiv formada qurulmasının əhəmiyyəti barədə fikirlərini bildirib. Qüdrət Həsənquliyev və Çingiz Qənizadə vəkilliyin gələcək inkişafı, bu peşənin əhəmiyyəti barədə fikirlər səsləndirib və təkliflər irəli sürüblər.

Gununsesi.info