“Deputatların mediada açıqlaması ciddi narazılıq yaradıb. Problemi bilmədən, araşdırmadan mövqe bildirmək düz deyil”.
Gununsesi.info xəbər verir ki, bunu baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov parlamentdə çıxışı zamanı deyib.
Onun sözlərinə görə, millət vəkili Çingiz Qənizadə və Hikmət Babaoğlu APA-ya açıqlamasında qaçqınlarla bağlı bir sıra problemləri qaldırıblar.
“Mən kimin hansı ifadə işlətməsinin əleyhinə deyiləm. Heç olmasa, bir məsələ və ya problem barədə danışanda onu gərək araşdırıb, öyrənib dəqiqləşdirəsən və sonra mövqe bildirəsən. Ən pis halda soruşmalısan”– deyə, baş nazirin müavini vurğulayıb.
Baş nazirin müavini onu da deyib ki, son zamanlar qaçqın və məcburi köçkünlərə qarşı “hücumlar” artıb:
“Ancaq bu kateqoriyaya aid olan insanlar ölkənin ən zərif və həssas təbəqəsidir. Ölkə başçısı da bu təbəqəyə qarşı çox həssaslıqla yanaşır”.
Qaçqınlara verilən güzəştlərlə bağlı yayılan fikirlərə mövqeyini açıqlayan Ə. Həsənov deyib ki, bu, Azərbaycanın daxili işidir və kimsə buna müdaxil edə bilməz:
“Azərbaycan əhalisinin hansı təbəqəsinə güzəşt verir, hansı hissəsinə yox, buna kimsə qarışa bilməz. Odur ki, bu açıqlamalar qaçqın və məcburi köçkünlərdə ciddi narazılıq yaradıb. Onları niyə görə incitməliyik?! Onsuz da onlar hər şeyini itirib”.
Millət vəkili Çingiz Qənizadənin “Qaçqınkomda”kı yeyintilərlə bağlı açıqlamasına gəldikdə isə komitə sədri deyib ki, hər kəs öz adından danışmalıdır.
O, yemək, qaz, elektrik enerjisi ilə, qaçqınlara verilən vəsaitlərlə bağlı fərqin olmasını dilə gətirib:
“Təbii ki, bu fərq olacaq. Çünki qaçqının bir hissəsi bulaq suyundan və kanal suyundan istifadə edir. Niyə də bu fərq olmasın? Bir qisim qaçqınlar isə qazla təmin olunmayıb. Təbii ki, fərq olacaq. Sabah da müxalifət götürüb yazacaq ki. “Qaçqınkomda” yeyinti var”.
Ə.Həsənov onu da bildirib ki, qaçqın və məcburi köçkünlərlə bağlı bu yaxınlarda qərar olacaq:
“Ancaq bunun maliyyə çətinliyi ilə heç bir əlaqəsi yoxdur. Dövlət bu kateqoriya insanlar üşün lazım olan vəsaiti tapacaq”.
Mürtəza
Gununsesi.info
