Daxili İşlər Nazirliyi (DİN) sosial şəbəkələrdə məhkəmənin həbsdən azad etdiyi vətəndaşın döyülməsi və yenidən saxlanılması barədə çəkilmiş videogörüntülərə münasibət bildirib.
Nazirlik açıqlamasında bildirib ki, oğurluq əməlində şübhəli bilinən şəxsin 36-cı polis bölməsində döyülməsi iddiaları ilə bağlı araşdırma aparılır.
Qeyd edək ki, sosial şəbəkələrdə oktyabrın 10-da axşam saat 22.00 radələrində Xətai rayon Məhkəməsinin dəhlizində çəkildiyi iddia olunan videogörüntülər yayılıb. Həmin görüntülərdə İsmayıl Qəhrəmanov adlı şəxs oktyabrın 6-dan Xətai rayonu, 36-cı polis bölməsində işgəncələrə məruz qaldığını bildirir. Onun sözlərinə görə, işgəncənin məqsədi oğurluqla bağlı cinayəti üzərinə götürməsidir.
36-cı polis bölməsində Qəhrəmanov haqqında İnzibati Xətalar Məcəlləsinin 206-cı (şəxsi istehlak miqdarında narkotik əldə etmə, daşıma, saxlama) maddəsilə protokol tərtib edilib, həbs olunması üçün məhkəməyə gətirilib. Oktyabrın 10-da axşam saat 21.00 radələrində bu işə baxan hakim Qəhrəmanovu həbsə göndərməyib, onun haqqında cərimə qərarı çıxarıb. Sözügedən videogörüntülər də Qəhrəmanov məhkəmə zalında azad ediləndən az sonra – məhkəmə binasının dəhlizində çəkilib.
Videoda şəxsin sifət nahiyəsində xəsarət izləri də aydın görünür.
Gununsesi.info
