“Beynəlxalq ictimaiyyət münaqişələrin qarşısının alınması və həlli üzrə rıçaqların böyük hissəsini itirib. Buna görə də mənim prioritetim sülhün möhkəmləndirilməsi üçün diplomatik fəaliyyətinin genişləndirilməsi olacaq”.
Gununsesi.info-nun xəbərinə görə, bu haqda BMT-nin yeni təyin olunmuş baş katibi Antonio Qutyerriş deyib.
O qeyd edib ki, çox şeyin BMT-yə üzv dövlətlərdən asılı olduğunu, baş katibin imkanlarının məhdud olduğunu başa düşür: “Bununla belə, mənə elə gəlir ki, sadəcə, vasitəçi olmayıb sülh prosesini fəal təşviq etməklə məsələyə daha çox dövlətin diqqətini çəkmək olar”-, deyə o bildirib. Baş katib bildrib ki, münaqişələrin mövcudluğu ən çox qaçqınların və köçkünlərin əzab çəkməsinə səbəb olur.
Qeyd edək ki, oktyabrın 13-də BMT Baş Assambleyası Təhlükəsizlik Şurasının tövsiyəsi əsasında səsvermə keçirmədən təşkilatın keçmiş Qaçqınlarla iş üzrə Ali Komissarı Antonio Qutyerrişi 2017-ci il yanvarın 1-dən 2021-ci il dekabrın 31-dək BMT baş katibi seçib. O, bu postda Pan Gi Munu əvəzləyəcək.
Gülnaz Qənbərli
Gununsesi.info
