“Bloomberg” Agentliyi dünyanın ən varlı adamlarının siyahısını dərc edib.
Gununsesi.info Rusiya Kiv-nə istinadən xəbər verir ki, siyahıya 85.6 milyard dollarla yenə “Microsoft”un yaradıcısı, Bill Geyts başçılıq edir.
İkinci yerdə yenə 78.9 milyard dollarlıq sərvətlə “Berkshire Hathaway” sərmayə şirkətinin rəhbəri və ən böyük payçısı Uorren Baffet durur.
3-cü yerdə 73.5 milyard dollarla dünyanın ən böyük onlayn ticarət şirkəti olan “Amazon”un rəhbəri Jeff Bezos, 4-cü yerdə 69.3 milyard dollarlıq var-dövlətlə “Inditex”in səhmlərinin 50 faizdən çoxunun sahibi Amancio Ortega, 5-ci yerdə isə 59.1 milyard dollarlıq sərvətlə dünyanın ən geniş sosial şəbəkəsi sayılan Facebook-un yaradıcılarından biri, eləcə də icraçı direktoru Mark Zukerberg bərqərar olub.
Siyahıda əslən azərbaycanlı iş adamı Vahid Ələkbərovun da adı var. O, 11.4 milyardlıq sərvətiylə siyahıda 104-cü yeri tutur. V.Ələkbərov Rusiyanın ikinci ən böyük neft şirkəti «LukOil»un prezidentidir. O, həmçinin enerji, bank, inşaat sahəsi və mətbuata sərmayə qoyan «IFD Kapital»da səhmlərin 25 faizinə sahibdir.
Gürcüstanın hakim “Gürcü arzusu” Partiyasının təsisçisi, milyarder Bidzina İvanishvili dünya varlılarının siyahısında 276-cı yerdədir. «Bloomberg» onun var-dövlətinin 5.52 milyard dollara çatdığını yazır.
Gülnaz Qənbərli
Gununsesi.info
