Fazil Məmmədov prezidentin köməkçisinin iradlarına cavab verdi - "MƏNİM XƏBƏRİM YOXDUR"

  • By admin
  • 16 Fevral 2018 10:06

“Kim şikayət edib məndən? Bu nədir yazırsız?”.

Gununsesi.info xəbər verir ki, bunu “Bizim yol”a açıqlamasında keçmiş Vergilər naziri Fazil Məmmədov deyib. Prezident Administrasiyasına edilən şikayətlər haqda suala cavab verən F. Məmmədov bildirib ki, heç kimin hesabı qanunsuz dondurula bilməz: “Heç kimə əlavə borc yazıla bilməz. Kimə nəsə yazılıbsa, o da qanun çərçivəsində yazılıb. Kiməsə qanundan kənar nəsə yazılıbsa, bundan mənim xəbərim yoxdur. Kim edib cəzasını almalıdır”.

Qeyd edək ki, ötən il hüquqi şəxslərdən və sahibkarlardan daxil olan 278 şikayətdə vergi, hüquq mühafizə, şəhər və rayon icra hakimiyyəti orqanlarının, ayrı-ayrı vəzifəli şəxslərin sahibkarların işinə maneələr yaratmasından narazılıq bildirilib və kömək istənilib. Prezident Administrasiyasının sənədlərlə və vətəndaşların müraciətləri ilə iş şöbəsinin müdiri Süleyman İsmayılov  bildirib ki, sahibkarlar bəzi hallarda vergi orqanlarının onlara əsassız olaraq külli miqdarda borc yazmasından, buna görə fəaliyyətlərini dayandırmağa məcbur olduqlarından, Vergilər Nazirliyinin Bakı Şəhəri Lokal Gəlirlər Departamenti tərəfindən bank hesablarının bloklanmasından, qanunsuz sərəncamların tətbiq edilməsindən və digər məsələlərdən narazılıqlarını bildirdiklərini qeyd ediblər.

Gununsesi.info