Kiyev administrasiyasına verilən iqtisadi dəstək və Rusiya-Ukrayna müharibəsindən sonra Moskva administrasiyasına tətbiq edilən sanksiyalar Avropada inflyasiyanı artırıb.
Gununsesi.info xəbər verir ki, iqtisadi vəziyyəti yaxşı olan ukraynalıların müharibədən təsirlənməməsi, Rusiya ordusunun işğal etdiyi rayonlardan əks-hücumla çıxarılmaması Avropa dövlətlərinin planlarını alt-üst edib.
Alıcılıq qabiliyyəti böhranından təsirlənən peşəkar qruplardan biri də fermerlər olub. Davamlı olaraq artan dizel vergiləri Kontinental Avropadan İngiltərəyə yayılan etirazlara qapı açıb. Əvvəlcə Avropa İttifaqının (Aİ) ən böyük kənd təsərrüfatı ölkəsi olan Fransada fermerlər küçələrə çıxıb. Fəallar istehsala görə kifayət qədər maaş almadıqlarını bildiriblər. Fermerlər ətraf mühitin qorunması ilə bağlı qaydaların istehsal xərcləri ilə bağlı onlara təzyiq etdiyini iddia edib.
Etirazçılar enerji, gübrə və nəqliyyat üçün yüksək xərclərin əlçatmaz hala gəldiyini bildiriblər. Fransız fermerlər nümayişlərdən sonra hökumətin açıqlamasını gözləyiblər. Baş nazir Qabriel Attalın çıxışında məsələyə toxunmaması etirazçıları daha da qəzəbləndirib. Onlara məhəl qoyulmadığını bildirən fəallar bu dəfə paytaxt Parisə doğru yollanıb. A6 avtomobil yolu nəqliyyatın hərəkəti üçün bağlanıb.
Etirazlar davam edərkən, Fransa prezidenti Emmanuel Makron fermerlərin etirazlarını müzakirə etmək üçün kabinetdə bəzi nazirlərlə görüşüb. Ancaq qəti bir həll ictimaiyyətlə paylaşılmayıb.
Fransada başlayan nümayişlər tezliklə qonşu ölkələrə, daha sonra La-Manş boğazından keçərək Britaniyaya yayılıb.
Aİ əleyhinə müxalifətin artdığı Almaniyada 2024-cü il büdcəsini balanslaşdırmağa çalışan hökumət kənd təsərrüfatı dizelinə vergi endirimini mərhələli şəkildə ləğv etmək qərarına gəlib. Vəziyyətdən xəbər tutan fermerlər az sonra küçələrə axışıblar. Almaniya federal kansleri Olaf Şolts hökumətini lazımi addımları atmağa çağırıb.
İspan fermerlər Fransadakı həmkarları ilə oxşar səbəblərdən küçələrə çıxmaq qərarına gəliblər. Ölkənin cənubunda yerləşən Badajoz bölgəsində kiçik qruplar halında keçirilən etiraz aksiyaları tezliklə Huelva və Sevilya şəhərlərinə də yayılıb.
Fəallar məhsulların tarladan çıxıb piştaxtalara çıxması ilə qiymətlərin artdığını və hökumətin bununla bağlı tədbir görməli olduğunu müdafiə ediblər. İspaniyalı nümayişçilər fevralın 13-də mübahisəli bölgə olan Kataloniyada, fevralın 21-də isə paytaxt Madriddə traktorlarla yolları bağlayacaqlarını açıqlayıblar.
İtaliya, Rumıniya, İrlandiya, Belçika, Hollandiya, Polşa, Macarıstan və bir çox Avropa ölkələrində də oxşar səhnələr olub.
Ağırlıq mərkəzi Almaniya olan ittifaqın siyasətini hökumətlərin həyata keçirməsi fermerləri üsyan həddinə çatdırıb.
Bu məqamda ən kritik hərəkət 1200 traktorla Belçikanın paytaxtı Brüsseldə Avropa Parlamentinin binasına gedən yolların bağlanması olub. Polis təzyiqli su və gözyaşardıcı qazla kütləyə müdaxilə edib. Fermerlərin etirazını artıran amillərdən biri də kənd təsərrüfatı sektoruna maliyyə dəstəyinin kəsilməsidir.
Belə hesab edilir ki, bu vəziyyət Rusiya-Ukrayna müharibəsi nəticəsində yaranmış yüksək xərclər və inflyasiya ilə bağlıdır.
Digər tərəfdən, Kiyevə dəstək üçün bağlanmış müqavilələrlə Ukraynadan ucuz taxıl məhsulları gətirilir.
Braziliya və Argentinadan daha çox mal ətinin idxalının və ABŞ ilə bağlanan müqavilələrin haqsız rəqabəti ortaya çıxardığı iddia edilir.
Fermerləri üsyan nöqtəsinə gətirən digər məqam isə ekoloji cəhətdən təmiz kənd təsərrüfatı siyasətidir.
Məlumdur ki, Aİ-nin Yaşıl Sövdələşməsinə daxil olan pestisidlər qadağandır, lakin digər ölkələrdən gələn məhsullara nəzarət o dərəcədə deyil.
Hollandiyalı fermerləri dəstəkləyən Geert Vildersin ifrat sağçı partiyası seçkilərdə birinci olub.
Almaniyada yüksələn AFD və digər sağçı hərəkatlar AB Kənd Təsərrüfatı Nazirlərini tələbləri eşitmək və qəzəbi sakitləşdirmək üçün lazımi tədbirlər görməyə məcbur edib.
Aİ Peşəkar Kənd Təsərrüfatı Təşkilatları Komitəsinin sədri Kristian Lambert mövzu ilə bağlı ehtiyatlı açıqlamalar verib. O, kənd təsərrüfatı dünyasındakı bu reaksiyanı “kollektiv qəzəb” kimi qiymətləndirib.
İctimai rəy sorğularına görə, Avropa ölkələrində vətəndaşların orta hesabla 70 faizi fermerləri dəstəkləyir. Bu, yeni üsyanların yolda ola biləcəyini göstərir.
İyun ayında keçiriləcək Avropa Parlamentinə seçkilər öncəsi gərgin mühit ittifaqın gələcəyi ilə bağlı şübhələr yaradır.
Gununsesi.info
