Fransa Ermənistana hərbi texnika adı altında dəmir parçasını göndərib.
Gununsesi.info Trend-ə istinadən xəbər verir ki, sosial şəbəkələrin erməni seqmenti sevincdən titrəyir – nəhayət, Fransanın çoxdan gözlənilən silahı Ermənistana doğru yol aldı. Ancaq sevinc üçün bir səbəb varmı? Belə çıxır ki, yox.
Məsələ burasındadır ki, “Acmat” şirkətinin istehsalı olan “Bastion” çoxməqsədli zirehli maşınları Afrika və Yaxın Şərqin iqlim şəraitinə uyğunlaşdırılıb. Yəni Cənubi Qafqaz şəraitində bu zirehli maşınlar çox həssas və praktiki olaraq istifadəyə yararsız olacaq.
“Bastion” zirehli maşınların olduğu ölkələrin siyahısına baxmaq kifayətdir: Benin, Somali, Qabon, Kamerun, Keniya, Kot-d’İvuar, Kamerun, Mali, Burkina Faso və digər Afrika ölkələri.
Hətta Afrikada bu zirehli maşınlar dəmir parçasından başqa bir şey deyildi. 2016-cı ilin dekabrında “Bastion” zirehli maşını peşəkar ordu olmayan “Ənsar-ül-İslam” qruplaşması tərəfindən məhv edilib.
Fransa hərbi texnikasının Ermənistana tranzitinə icazə verən Gürcüstan tərəfinə də suallar var. Bir tərəfdən, Tbilisi özünü Bakı ilə İrəvan arasında sülh müqaviləsi bağlamaq üçün platforma kimi təqdim edir. Digər tərəfdən, Ermənistana silah tədarükü yalnız regionda vəziyyətin gərginləşməsinə xidmət edir.
Ermənilərin nəyə sevindiyini anlamaq çətindir. Axı Fransa Ermənistana başa salır ki, o, onun üçün hətta “kiçik bacı” da deyil, ondan tez qurtulmaq istədiyi üçüncü dərəcəli “uzaq qohum”dır. Beləliklə, Fransanın Ermənistana göndərdiyi hərbi texnika adi dəmir parçasından başqa bir şey deyil.
