Gürcüstan Avropa İttifaqına (Aİ) üzvlük üçün namizəd statusu alındıqdan sonra islahatların aparılmasını dayandırmayacaq və təşkilata tamhüquqlu üzvlük əldə olunana qədər davam etdirəcək.
Gununsesi.info xəbər verir ki, bunu ölkənin Xarici İşlər Nazirliyinin (XİN) rəhbəri İlya Darçiaşvili deyib.
“Bu 12 tövsiyə ölkəmizin iddialı islahatlar gündəliyinin bir hissəsidir. Biz islahat prosesini bu il başa çatdırmırıq. Bu proses Gürcüstan Avropa İttifaqının tamhüquqlu üzvü olana qədər davam edəcək”.
Nazir bildirib ki, ötən həftə Aİ-nin xarici siyasət xidmətinin rəhbəri Josep Borrell ilə tövsiyələrin icrasını müzakirə edib. O, Gürcüstana səfərini həm praktiki baxımdan, həm də onun üçün seçilən vaxtı nəzərə alaraq ən vacib səfər adlandırıb.
Qeyd edək ki, Avropa İttifaqı Gürcüstana ölkənin müdafiə qabiliyyətini gücləndirmək üçün 62 milyon avro ayırmışdı. Borrell Gürcüstan ordusu üçün “qeyri-öldürücü texnikanın” ilk partiyasının aprel ayında respublikaya gəldiyini və tədarükün davam etdiyini bildirib.
Tərcümə
Şəbnəm
