İsrail prezidenti oktyabrın 7-də HƏMAS-ın hücumları zamanı görüntüləri ortaya çıxan Almaniya vətəndaşı tatu ustası Şani Loukun necə öldürülməsinin təfərrüatlarını açıqlayıb.
Gununsesi.info xəbər verir ki, sosial mediada paylaşılan videoda Louka aid olduğu güman edilən qadının maşında aparıldığı görüntülənib. Huşsuz olduğu düşünülən Loukun ayağının tərs vəziyyətdə və yarıçılpaq olması gündəmdə olan mövzu idi. Həmin videoda HƏMAS silahlılarının Louka tüpürdükləri və təhqir etdikləri görülüb.
23 yaşlı gənc qadının ailəsi əvvəlcə qızlarının sağ olduğuna inandıqlarını desələr də, dünən Loukun öldürüldüyü açıqlanıb. Dünən axşam saatlarında İsrail prezidenti İsxak Hersoq Almaniya mətbuatına danışıb. “Bild” qəzetinə müsahibə verən Hersoq bildirib ki, Loukun kəllə sümüyü tapılıb. “DNT nəticələri də identifikasiyaya imkan verdi. Bu o deməkdir ki, bu barbar, sadist heyvanlar israillilərə hücum edərkən, işgəncə verərkən və öldürərkən onun başını kəsiblər. Bu, böyük faciədir və mən onun ailəsinə dərin hüznlə başsağlığı verirəm”.
Loukun anası Rikarda Louk da Almaniyanın RTL/ntv mediasına danışıb. “Heç olmasa əziyyət çəkmədi. “Qızımın cəsədi hələ tapılmayıb, lakin onun kəllə sümüyünün bir parçası tapılıb və DNT analizi zamanı onun qızıma aid olduğu məlum olub”, – deyə o bildirib.
Gununsesi.info
