Naxçıvan Muxtar Respublikasının Ağır Cinayətlər Məhkəməsində keçmiş maliyyə naziri Rəfael Əliyevin növbəti məhkəmə prosesi keçirilib.
Gununsesi.info-nun xəbərinə görə, 145 milyon manata yaxın yeyintidə suçlanan Rəfael Əliyev məhkəməyə ifadəsibdə özünü qismən təqsirli bilib.
Onun sözlərinə görə, istər 2020-ci ilədək Naxçıvan MR-in Gömrük Komitəsində çalışdığı dövrdə, istərsə nazir vəzifəsini tutanda maaşından əlavə paketdə pul alıb. Sabiq nazir bildirib ki, Naxçıvan MR Gömrük Komitəsində Gömrük tariflərinin tənzimlənməsi və ödənişlər şöbəsinin rəisi vəzifəsində işləyəndə hər ay maaşından əlavə, ayrıca zərfdə ona 1500 manat verilirmiş. Nazir olduğu dövrdə isə aylıq rəsmi maaşı 2 min 300 manat, paketdə aldığı pulun məbləği 15 min manat olub: “Hər ay 15 min manatı Seymur Talıbov mənə sürücüsü vasitəsilə göndərirdi”.
İttiham aktında isə Naxçıvan MR Gömrük Komitəsində 2016-2022-ci illərdə yeyinti və korrupsiyadan, eləcə də R.Əliyevin maliyyə naziri olduğu dövrdəki mənimsəmələrdən söz açılır.
R.Əliyevə 144 milyon manatlıq ittihamın 3 milyondan bir qədər çox hissəsi onun çalışdığı iki ilə aiddir. İddia olunur ki, müxtəlif dövlət strukturlarında mənimsənilən vəsaitin 10 faizi Maliyyə Nazirliyinə çatıb. Bu üzdən, nazirlik də dövlət orqanlarındakı on milyonlarla manat yeyintiyə göz yumub.
Məhkəmə ifadəsində R.Əliyev öncə Gömrük Komitəsindəki fəaliyyətindən danışıb və bu sistemdə 2009-cu ildən işə başladığını söyləyib.
“Mənə gətirilib verilən pullar arasında həm dollar olurdu, həm də manat”
Onun sözlərinə görə, gömrükdə həm böyük yük üçün ödəniş alınırdı, həm də sərnişinlərin gətirdiklərindən. Sərnişin və yük şöbələri ayrı olduğundan hər istiqamət üzrə toplanmış vəsait də həmin şöbənin rəhbərinə çatdırılırdı. R.Əliyev bildirib ki, şöbə rəisləri də öz növbələrində pulu idarə rəisinə verirdi. Son nəticədə isə toplanan pullar Gömrük Komitəsi sədrinə çatırdı.
“Mənə gətirilib verilən pullar arasında həm dollar olurdu, həm də manat. Manatları da dollara çevirib komitənin sədrinə verirdim”.
Nazir vəzifəsinə təyin olunandan sonra baş verənlərə gəlincə, o deyir ki, ayrı-ayrı dövlət orqanlarında qiymətlərin şişirdilməsi, bu yolla büdcə vəsaitlərinin yeyilməsi hallarını üzə çıxarıb. Bu barədə Naxçıvan MR Ali Məclisinin sədri Vasif Talıbovun oğlu Seymur Talıbovu bilgiləndirib. S.Talıbov problemin çözüm yolunu o qurumların hər birindən mənimsənilən məbləğin 10 faizini almaqda görüb. Təqsirləndirilən R.Əliyev deyir ki, bu göstərişə də əməl edilib.
Sabiq nazirə qarşı ittihamlardan biri də nazirlikdə dövlət qulluqçusu statusu olmayan əməkdaşlara da əlavə maaş yazılmasıdır. Bu yolla 100 min manata yaxın büdcə vəsaiti israf olunub. Bu ittihamla razılaşmayan R.Əliyev deyir ki, həmin maaş məbləğləri o, nazir təyin olunmazdan öncə müəyyənləşdirilmişdi.
Digər təqsirləndirilən Mansur Əsgərov isə 138 milyon manatın mənimsənilməsində iştirakda suçlanır. O, 20 ildən çox Gömrük Komitəsində çalışıb.
Onun sözlərinə görə, 2020-ci ildə R.Əliyev nazir postuna gedəndən sonra onun əvəzinə Gömrük tariflərinin tənzimlənməsi və ödənişlər şöbəsinin rəisi vəzifəsinə təyin olunanda Gömrük Komitəsinin sədri onu qəbul edərək toplanan vəsaitin çatdırılma qaydasını söyləyib.
Əvvəlki vəzifələrində maaşdan əlavə paketdə 500 manat pul aldığını deyən M.Əsgərov danışıb ki, komitədə yeni təyinatından sonra paketdəki məbləğ 3 min manata qalxıb: “Alınan pullardan mənə heç nə çatmırdı. Hamısı komitə sədrinə çatırdı. Mənə paketdə yalnız 3 min manat verilirdi. Gətirilən pullar həm dollarla, həm də manatla olurdu. Manatı Nurlana verirdik, dəyişib gətirirdi. O, “Badamlı”da işləyirdi…”.
Sabiq məmurların məhkəməsi mayın 2-də davam edəcək.
Elmar Elnuroğlu
Gununsesi.info
