Qəzzaya hücumları müvəqqəti dayandıracaq, əsir mübadiləsi və humanitar yardıma imkan verəcək 4 günlük humanitar fasilə başlayıb.
Gununsesi.info xəbər verir ki, humanitar atəşkəs başlamazdan bir neçə dəqiqə əvvəl İsrailin Qəzza zolağına ən yaxın şəhəri olan Sderot sahillərində atışma və güclü partlayışlar müşahidə olunub. Qəzza zolağından İsrailə doğru raketlər atılıb və bölgədə hücum sirenləri səslənib.
Qətər Xarici İşlər Nazirliyinin açıqladığı konsensus planına əsasən, Qəzza zolağına humanitar yardımın daşınması İsrail və HƏMAS-ın saat 07:00 (08:00) tarixindən etibarən Qəzza zolağında qarşıdurmaları dayandırmasından sonra Rəfah Sərhəd Qapısından başlayacaq.
Misirdən yanacaqla dolu yük maşınlarının Qəzzaya girməyə başladığı bildirilib. İngilis xəbər agentliyi “Reuters” atəşkəsdən təxminən 1,5 saat sonra yardım yük maşınlarının Misirin Rəfah Sərhəd Qapısından keçdiyini açıqlayıb. İki yük maşınının üzərində “İnsanlıq üçün birlikdəyik” və “Qəzzadakı qardaşlarımız üçün” yazılı plakatlar olub.
BMT-nin açıqladığı rəqəmlərə görə, İsrailin blokadanı gücləndirdiyi və davamlı olaraq hücum etdiyi Qəzza zolağında 1,7 milyon insan didərgin düşüb. Humanitar fəlakət və dağıntıların ağır olduğu Qəzza zolağının şimal və şimal-qərbində yaşadığı bildirilən on minlərlə fələstinliyə yardım göndərilməsi ilə bağlı hələlik heç bir plan açıqlanmayıb.
Tərəflər arasında əldə olunan razılaşmaya əsasən, ilk gün blokadadakı Qəzza zolağında israilli məhbuslardan azad ediləcək eyni ailədən olan 13 israilli qadın və uşaq yerli vaxtla saat 16:00-da Rəfah Sərhəd Qapısına doğru hərəkət edəcək.
İsrailli məhbusların yoxlamaları tamamlandıqdan sonra sərbəst buraxılacaq fələstinli qadın və uşaq məhbusların işğal altındakı İordan çayının qərb sahilindəki Ofer hərbi həbsxanasında toplanacağı bildirilib. İlk gün sərbəst buraxılacaq, sayı və şəxsiyyətləri hələ açıqlanmayan fələstinli məhbusların Ofer həbsxanası yaxınlığındakı Beytunya keçid məntəqəsinə gətirilərək oradakı Fələstin səlahiyyətlilərinə təhvil veriləcəyi paylaşılıb.
Gununsesi.info
