Tanınmış araşdırmaçı-jurnalist Hafiz Babalı Bakı şəhər meri Eldar Əzizovun ailə biznesininin siyahısını açıqlayıb.
Gununsesi.org jurnalistin yazısına istinadən Bakı Şəhər İcra Hakimiyyətinin Başçısı işləyən Eldar Əzizovun sərvətlərini sizə təqdim edir:
Eldar Əzizovun ailəsinə məxsus ilk şirkət o, hələ Nizami rayon İcra Hakimiyyətinin başçı işləyərkən yaradılmışdı. Xanımı Nərgiz Xeyrulla qızı Əzizovanın iştirakı ilə qurulan “S.T. İsmayılova və N.X. Əzizovanın tam ortaqlı “XƏZƏR” firması” (VÖEN 1700646601) 2002-ci ildə təsis olunub.
Sonrakı illərdə (2006-2010) “Zebra-İD” MMC, “Günəş-2” MMC, “Olimp-5” MMC, “Green Tour” MMC, “Greenfin Food And Baverage” MMC və “Green Trade” MMC təsis olunub. Bu şirkətlərdə Eldar Əzizovun oğlunun ortaqları “İtalDizayn” QSC (“Zebra-İD” MMC), Orxan Aydın oğlu Əliyev (“Green Tour” MMC, “Greenfin Food And Baverage” MMC və “Green Trade” MMC) və Ehtiram Mehdi oğlu Qasımovdur. Dörd şirkətin (“Günəş-2” MMC,“Zebra-İD” MMC, “Green Tour” MMC və “Greenfin Food And Baverage” MMC) direktoru Şamil Əzizovdur.
“Green Tour” şirkəti 2012-ci ildə Mədəniyyət və turizm Nazirliyindən turizm fəaliyyət göstərmək üçün xüsusi razılıq (lisenziya) alıb. Adı çəkilən digər şirkətlərin biznes fəaliyyəti isə açıq mənbələrdə məlumat yoxdur.
“Xəzər” firması ilə “Olimp-5” MMC-nin hüquqi ünvanı Eldar Əzizovun qeydiyyatda olduğu ünvanla (Bakı şəhəri, Yusif Məmmədəliyev küçəsi, ev 19) uyğun gəlir. Dövlət reyestr məlumatlarına görə, “Olimp-5” şirkətinin direktoru Coşqun Adil oğlu Cəbrayılovdur. Eldar Əzizov 2018-ci ildə Bakı şəhər İcra Hakimiyyətinə başçı təyinatından sonra onu özünə köməkçisi vəzifəsinə gətirib. Bundan öncə onlar Səbail rayon İH-da işləyirdilər. Biri başçı, digəri isə Ərazi İdarəetmə orqanları ilə iş şöbəsinin müdiri idi.
Şamil Əzizovun 25 yaşında ikən (2009-cu il) həmtəsisçisi olduğu “Günəş-2” MMC-nin dövlət qeydiyyatına alındığı ünvanda (Mirəli Seyidov küçəsi, 5 nömrəli evdəki mənzillərdən biri) “Azəri Saplay Kompani Ltd” MMC də var. Dövlət satınalmaları reyestrində bu şirkətin “AzTV”-yə 230 985 manat dəyərində videokamera akkumulyatorlarının, Heydər Əliyev Mərkəzinə isə 14 885 manatlıq “gül dəstlərinin səbətlərin komposiziyalarının” və “kreativ şam ağaclarının” satıldığı qeyd olunub.
Bizneslə yanaşı, Ş. Əzizov elmi fəaliyyətlə də məşğuldur. O, UNEC-in məzunudur. 2018-ci ildə burada “İdxal-ixrac əmələliyyatlarına valyuta nəzarətinin təkmilləşdirilməsi problemləri” mövzusunda namizədlik dissertasiyasını müdafiə edib. 2019-cu ildə isə “Dünya iqtisadiyyatı” ixtisası üzrə UNEC-in doktoranturasına büdcə hesabına qəbul olunub.
İş adamı Şamil Əzizov Koronavirusa Qarşı Mübarizə Fonduna 3000 manat köçürüb.
Onun həyat yoldaşı Banuçiçək Əzizova Səbail rayonunda yerləşən 157 nömrəli uşaq bağçasının müdiridir.
